Agron Mustafa përplasje të ashpra me Milaim Zekën

Ish-kryeshefi i Telekomit, Agron Mustafa, i ftuar për intervistim nga Komisioni Hetimor Parlamentar në lidhje me gjendjen në Telekomin e Kosovës, është përballur sy më sy me deputetin Milaim Zeka. I pari ka qenë Mustafa i cili ka kërkuar që Milaim Zeka të mos jetë pjesë e komisionit.

“Milaim Zeka nuk duhet të jetë pjesë e komisionit. Me kërcënime e shantazhe publike, ka bërë që edhe Policia e Kosovës të më thërras për intervistim” deklaroi Mustafa.

Ai këtë kërkesë ia shtroi kryetarit të komisionit, deputetit Visar Ymerit, transmeton Gazeta Express.

Por, Ymeri ia ka refuzuar atij këtë kërkesë, duke deklaruar se anëtarët e komisionit janë deputetë të zgjedhur nga Kuvendi i Republikës së Kosovës.

Ndërsa kësaj iu përgjigj edhe Milaim Zeka, ai e akuzoi Mustafën se ka rrahur femra në një lokal të Prishtinës dhe ka rrahur Rexhë Balajn brenda institucioneve të PTK-së.

“Biografia jote flet shumë, përpos rrahje, femrat që i ke rreh në Dicka Po Zihet, je rrah brenda institucionit me Rexh Balajn” tha Zeka.

Madje Zeka tha se nuk janë të vërteta fjalët se ai e ka personale me Mustafën, duke thënë se në fakt është e kundërta. Sipas tij, Mustafa e ka personale me të e jo e kundërta.

Ndërsa Mustafa, në fund shtoi se ai e shtroi këtë kërkesë me arsyen se këtë ia lejon edhe ligji. Sipas tij, “Ligji për parandalimin e konfliktit të interesit, neni 7, më detyroi ta bëj këtë kërkesë”. /GazetaExpress/

SHPËRNDAJE