Angli –Kroaci, edhe Albin Kurti u përfshi në ethet e ndeshjes

Edhe lideri i Vetëvendosjes, Albin Kurti, është bërë pjesë e komenteve rreth ngjarjes më të madhe të futbollit, Kampionatit Botëror, në finalen e së cilit u kualifikuar kombëtarja e Kroacisë.

Kurti ka shkruar në Facebook pas triumfit të Kroacisë kundër Anglisë, se kjo ka treguar më së miri se mosdorëzimi i bën popujt e vegjël, të mëdhenj.

Kurti ka shkruar po ashtu se politika është e përfshirë në sport dhe këtë e dëshmon pjesëmarrja e liderëve të shteteve në stadiume.

Ky është shkrimi i plotë i Kurtit:

Nuk ka popuj të vegjël

Kupa e botës është kulmi i lëvizjes futbollistike në glob, mirëpo organizimi i botës në shtete dhe i përfaqësueseve futbollistike në skuadra kombëtare, e bën të pashmangshme perspektivën politike. Ndoshta shumëkush do që prania e politikës në sport të zbehet, mirëpo prezenca e presidentëve e kryeministrave në shkallët e stadiumeve, vetëm sa e konfirmon dimensionin e rëndësishëm politik të një ngjarje të tillë.

Fitorja futbollistike e Kroacisë përballë Anglisë, vendit ku kjo lojë u shpik e ku luhet një prej kampionateve më të forta e më të pasura në botë, tregon se përkushtimi, puna e mosdorëzimi i bën të mëdhenj edhe popujt e vegjël. Sigurisht edhe përkujdesja e investimi te rinia, te talentet, ashtu si edhe fryma e theksuar patriotike, që i ka bërë edhe yjet kroatë të lindur e të rritur në vende të tjera, të kthehen në Kroaci.

Jemi të lumtur që një nga fqinjët tanë dashamirë shkoi në finale, ashtu siç na vjen keq për anglezët, sepse dhe Anglia është vend mik i shqiptarëve. Shqipëria e Kosova fatkeqësisht nuk po e gjejnë rrugën e bashkimit në futboll, ndërkohë që në të dyja vendet politikat për sportin nuk janë aty ku duhet. Megjithatë, me shqiptarët e Zvicrës që shënuan ndaj Serbisë, e me Kroacinë në finale, ky botëror ka qenë interesant edhe për ne.

SHPËRNDAJE