Haradinaj e nderon Walkerin me medaljen “Skënderbeu”

Kryeministri në detyrë i Kosovës, Ramush Haradinaj, i ka ndarë medaljen “Skënderbeu” ish-ambasadorit të OSBE-së në Kosovë, William Walker.

Nëpërmjet një postimi në Facebook, Haradinaj thotë se Kosova është me fat që e ka pasur gjithnjë përkrahjen e Walkerit.

“Zhvillova një bisedë emocionale me ambasadorin William Walker, duke kujtuar kohët e vështira të Kosovës, në të cilat kohë, ai na qëndroi përkrah duke treguar dhe mbrojtur të drejtën dhe të vërtetën tonë.

Shpreha falënderim për angazhimin e tij të palodhshëm për të bashkuar diasporën tonë, në të mirë të vendit dhe për të ngritur çështjen kombëtare”, shkruan Haradinaj.

“E nderova me medaljen Skenderbeu, në ditën e kalimit në amshim të kryeheroit Gjergj Kastrioti”, thotë tutje Haradinaj.

Tutje, shkruan Haradinaj, “Kosova është me fat që në rrugëtimin e saj historik, ka pasur përkrah miq dhe aleatë, siç është Walker dhe populli amerikan”.

“Gjithmonë falënderues dhe mirënjohës!”, përfundon Haradinaj.

SHPËRNDAJE