Paralajmërhet heqja e taksës ndaj Serbisë, Haradinaj do ta dëgjojë Amerikën?!

Kryetari i të ashtuquajturit Komision Parlamentar për Kosovën në Serbi, Milovan Drecun, thotë se taksa prej 100 për qind ndaj Serbisë do të hiqet, pasi, sipas tij, Haradinaj do të pranojë kërkesën e SHBA-së në mënyrë që të mos ketë probleme me ta.

Sipas politikanit serb, rezistenca e Haradinajt për të mbajtur vendimin për taksën, mund të lidhet edhe me zgjedhjet e mundshme që mund të mbahen në Kosovë.

“Haradinaj dëshiron të shfaqet para elektoratit si i pamëshirshëm, tek i cili amerikanët nuk mund të ndikojnë, si dikush që nuk ka frikë nga askush. Kjo është një filozofi terroriste e malit por vjen një kufi kur duhet të veprojë siç kërkojnë SHBA-të dhe të kërkojë dalje nga situata në mënyrë që të mos ngatërrohet. Mendoj se taksa do të hiqet”, deklaroi Drecun për “TV Pink”.

I pyetur për t’i komentuar deklaratat e shefit të kabinetit të Haradinajt, Avni Arifi, se Qeveria nga Prishtina mund ta pezullojë përkohësisht taksën ndaj mallrave serbe, Drecun ka theksuar se kjo nënkupton se taksa do të pezullohet deri në arritjen e një marrëveshjeje.

“Ne vetëm dëshirojmë që taksa të hiqet, të mos ekzistojë më, në mënyrë që të jemi në gjendje t’i vazhdojmë bisedimet”, theksoi ai. Drecun beson se SHBA-të kanë rol shumë të rëndësishëm dhe se presidenti amerikan Donald Trump me iniciativë personale i kushton rëndësi asaj që amerikanët dëshirojnë të ndodh.

“Ata dëshirojnë të vazhdojnë bisedimet dhe të arrihet një marrëveshje për statusin përfundimtar të Kosovës. Mendoj se kjo është edhe në interesin tonë, përndryshe, alternativa atje ka qenë ajo për çka flet Edi Rama. Për këtë duhet të jemi të vetëdijshëm. Mos dyshoni se Kosova dhe Shqipëria do të bashkoheshin sot, nëse do të ekzistonin pengesa të tjera”, theksoi Drecun.

Ai ka thënë se Serbia dëshiron të gjejë një zgjidhje me Kosovën edhe për të sqaruar bashkëjetesën e dy popujve të ndryshëm në Kosovë. “Nuk jemi ne krahu i fortë në Kosovë, janë ata. Por, ne dëshirojmë t’i mbrojmë interesat tonë”, përfundoi ai.

SHPËRNDAJE