“Policia e Kosovës në linjë me standardet globale të sigurisë”

Misioni i OSBE-së dhe Policia e Kosovës sot organizuan pritje për nder të çmimit ndërkombëtar për lidership nga kolonele Taibe Canollit.

Me këtë rast, komandanti i Policisë së Kosovës, Rashit Qalaj, në urimin e tij për marrjen e çmimit nga kolonelja Canolli, tha se çmimi është frymëzim për të gjithë që të punojnë më shumë, e me përkushtim të arrijnë hapave të koleges Canolli.

Qalaj: Ky çmim duhet të jetë me së paku personal për kolegen

“Ky çmim duhet të jetë mesë paku personal për kolegen, me qenë se kjo është mbikëqyrëse e nivelit të lartë në Policinë e Kosovës, dhe e mbikëqyr një numër mjaft të madh të personelit, dhe kredia i shkon asaj, është meritë e saj, mirë po konsideroj që secili person që është sot këtu, që merr pjesë këtu, e ka një kontribut për çmimin që e ka marrë kolonelja Canolli”, tha Qalaj.

Ai shtoi se si drejtor i ri i Policisë së Kosovës, ndër kriteret e tij ka edhe përkrahjen e gruas në Policinë e Kosovës.

Jan Brathu, shef i misionit të OSBE-së në Kosovë, ka vlerësuar lart punën e Policisë së Kosovës, duke thënë se ajo është profesionale dhe sipas anketave 61 për qind e njerëzve janë të kënaqur me punën e Policisë së Kosovës.

Ai tha se përfshirja e femrave në Policinë e Kosovës është rritur në dy dekadat e fundit, e cila është rezultat i punës së menaxhmentit, duke bërë që ky institucion të ofrojë shërbime efikase për qytetarët e Kosovës.

Brathu: Policia e Kosovës në linjë me standardet globale të sigurisë

“Kjo është arritje e rëndësishme për Canollin, por po ashtu edhe për njohjen ndërkombëtare të përpjekjeve të Policisë së Kosovës duke qenë në linjë me avancimin e standardeve globale të sigurisë. Policia e Kosovës ka pasur angazhime të vërteta për zhvillimin e karrierës për femra oficere dhe OSBE vazhdon të ofrojë mbështetje për këto përpjekje”, tha Brathu.

Fituesja e çmimit, Taibe Canolli, e cila është drejtoreshë për Burime njerëzore në Policinë e Kosovës, tha se rrugëtimi në karrierë për një zyrtar policor, nuk është asnjëherë i lehtë, shtuar kësaj faktin e të qenurit zyrtare policore, në një shtet dhe shoqëri të posa dalur nga lufta, siç ishte Kosova, dhe ky fakt e bënë akoma më krenare për të kaluarën e saj dhe të organizatës të cilës i takon.

Canolli: Optimizmi është besimi që udhëheq drejtë arritjeve

“Vërtet optimizmi është besimi që udhëheq drejtë arritjeve, andaj ky optimizëm, ky besim më ndihmoj dhe më dha guxim t’i tejkaloj të gjitha ato vështirësitë të cilat u shfaqën në rrugëtimin e karrierës sime. Edhe për kundër sfidave dhe vështirësive që ne kemi pasur për këto 19 vite punë në Policinë e Kosovës, prapë se prapë mund ta them se jam ndier gjithmonë e motivuar që të gjithë energjinë time t’ia kushtoj zhvillimit të Policisë së Kosovës, gjithmonë kisha në mendjen e time se veprimet ishin më të zëshme se sa fjalët, prandaj ne duhet të udhëheqim me shembuj, e jo me fjalë”, tha Canolli.

Kolonelja e Policisë së Kosovës, Taibe Canolli, është shpërblyer me çmimin ndërkombëtarë të Lidershipit të IAWP në Kanada.

Ky çmim i jepet policëve, që dallohen me të arriturat e tyre të vazhdueshme në Lidership, në zgjidhjen e problemeve, planifikimit, organizimit, komunikimit, të cilët japin një kontribut të rëndësishëm brenda agjencisë ose misionit për zbatimin e ligjit

SHPËRNDAJE