Prangoset “Vetëtima” e Prishtinës, vodhi mbi 20 kuleta të grave

Hajnesha e Prishtinës që vodhi mbi 20 çanta e kuleta të grave nëpër restorante, lokale e rrugë në qendër e në periferi të kryeqytetit më në fund është kapur nga Policia e Kosovës. Gjatë natës së mbrëmshme, hajnesha që quhet Vetëtima Berisha u prangos në “vetëtimë” nga policia.

Ishte shndërruar në ankth për shumë gra kosovare. Kohë më parë pati raportuar se si Vetëtima Berisha hynte në restorante, ua merrte çantat grave dhe qetësisht largohej me gjësende të huaja sikurse të ishin të sajat. Por duket se veprimtarisë së saj i erdhi fundi pasi ajo është prangosur dhe Prokuroria Themelore e Prishtinës ka bërë kërkesë në gjykatë për t’ia caktuar paraburgimim. Vendimi për të merret nesër.

Këto detaje i dha gjatë të shtunës për Gazetën Express kryeprokurori i Prokurorisë Themelore të Prishtinës, Imer Beka.

“Gruaja që ka vjedhur çanta të grave i ka mbi 20 raste të vjedhjeve. Mbrëmë është kapur nga policia në flagrancë diku në qendër të Prishtinës”, tha Beka të shtunën për Gazetën Express.

Shtoi se prokuroria ka bërë kërkesën për caktimin e paraburgimit.

“Mbrëmë është ndaluar, sot u bë kërkesa për caktim të paraburgimit, nesër gjykata e merr vendimin për të”, tha Beka.

“Zakonisht ka vjedhur çanta të grave, kryesisht në Prishtinë. Kemi qenë shumë të interesuar për kapjen e saj sepse ka pasur shumë raste”, përfundoi Beka.

Para dy vjetësh, Express ka shpërndarë video se si Vetëtima vodhi një çantë të një gruaje në një restorant. Viktima pati rrëfyer se në çantë ka pasur dokumentet personale, kartelën bankare, 400 euro, parfum origjinal si dhe gjësende tjera me vlerë.

SHPËRNDAJE