Publikimi i dosjeve të UNMIK-ut nga mediumi i Baton Haxhiut, flet Prokuroria Speciale në Hagë

Ka disa ditë që janë bërë publike disa dosje të UNMIK-it për vrasjet e ish-zyrtarit të LDK, Xhemajl Mustafa, ish-komandantit të UÇK, Ekrem Rexha dhe rastin e plagosjes së ish-deputetit të LDK-së, Fetah Rudi. Dosjet e publikuara nga ‘Albanian Post’ i Baton Haxhiut ngjallën shumë reagime ku mes të tjerash përmendeshin emra si të dyshuar për rastet e përmendura.

U raportua se drejtori i Albanian Post, mediumit që i publikoi dosjet e Misionit të OKB-së, është ftuar për intervistim nga Zyra e Prokurorit të Specializuar në Hagë. Por gazetari Baton Haxhiu ishte i shpejtë në mohimin e këtyre lajmeve.

Ai tha se nuk është ftuar nga Prokuroria Speciale në Hagë.

Gazeta Online ”Reporteri.net” ka kontaktuar me ZPS’në duke i kërkuar komente për çështjen e publikimit të dosjeve ku flitet për vrasjet e pas luftës që mund të jenë pjesë e hetimeve edhe nga Haga.

Por, Prokuroria e Specializuar në Hagë ka qenë e shkurtër përgjigjen për Reporteri.net.

“Ju faleminderit për komunikimin tuaj. Zyra e Prokurorisë së Specializuar nuk i komenton raportimet në media”, tha Bennett të premten.

Gazeta Online ‘Reporteri.net’ e ka pyetur zëdhënësin e Zyrës së Prokurorit të Specializuar për Kosovën, Christopher Bennett, edhe nëse Haxhiu është ftuar për intervistim rreth publikimit të dosjes së UNMIK-ut. Por, ai nuk është deklaruar.

Pas publikimit të dosjeve të UNMIK-ut, shumë zyrtarë të LDK-së u deklaruan për çështjen e Mustafës e Rudit duke kërkuar zbardhjen e rasteve të tyre.

Edhe vetë Rudi, i mbijetuar nga atentati në vitin 200, tha se përmbajtja e dosjeve të UNMIK-ut i konfirmoi ato që kishte thënë me vite të tëra.