Si iu avulluan Kosovës 20 mijë euro në New York

Një organizim i iniciuar nga Erolld Belegu e ka dëmtuar buxhetin e shtetit për 20 mijë dollarë amerikanë.

Me insistimin e tij, në New York, gjatë sesionit të fundit të Asamblesë së Përgjithshme të Kombeve të Bashkuara, në hotelin “Hilton” në Midtown ishte rezervuar një sallë për të organizuar pritje për krerët e delegacioneve botërore që merrnin pjesë në këtë ngjarje, por që kurrkush nuk i kishte shkuar.

“Pjesëmarrjen e kishte konfirmuar vetëm presidenti i Shqipërisë, z. Ilir Meta. Kurrkush tjetër, ndonëse ftesa ishte për shumë presidentë, kryeministra e ministra nga vende të ndryshme. Pra, eventi ka dështuar, sepse nuk ka pasur konfirmime nga delegacionet e ftuara”, ka thënë ky burim. “Dy-tri ditë përpara datës së planifikuar për t’u mbajtur, rezervimi është anuluar. Hoteli e ka ndalur koston e sigurisë në shumën prej 20 mijë dollarësh amerikanë, kurse kostoja për organizimin e pritjes ishte paraparë të shkonte në 50 mijë dollarë”.

Nga Prishtina në New York, për të marrë pjesë në margjinat e Asamblesë së Përgjithshme të OKB-së, kishin shkuar rreth 20 persona, si pjesë e delegacioneve nga Presidenca, Qeveria dhe nga Ministria e Punëve të Jashtme.

Belegu, këshilltar i kryeministrit Ramush Haradinaj, ishte pjesë e delegacionit, por kishte udhëtuar shumë më herët në SHBA. Sipas burimeve në Zyrën e kryeministrit, ai kishte fluturuar më 8 shtator, ndërsa është kthyer më datën 29 të atij muaji./Koha Ditore

SHPËRNDAJE