Zgjedhjet me shuma të majme parash, 216 mijë euro vetëm për informimin e publikut

Komisioni Qëndror i Zgjedhjeve tash e ca kohë ka nisur përgatitjet për zgjedhjet e parakohshme në vend që mbahen më 6 tetor.

Përgatitjet paraprake, që mbarëvajtja e këtij procesi të jetë në nivel, po i kushtojnë shuma të majme parash KQZ-së.

220 mijë e 883 euro janë paraparë që të shpenzohen nga KQZ-ja vetëm për informim të publikut për zgjedhje të jashtëzakonshme.

Kontrata, sipas kriterit të çmimit më të ulët të ofertuesit i është dhënë kompanisë, “Trigger”, me seli në Prishtinë.

Shumë e përgjithshme e kontratës është 216 mijë e 706 euro.

Kujtojmë se Qeveria e Kosovës kishte ndarë afër 6 milionë euro për mbajtjen e zgjedhjeve të parakohshme në Kosovë.

Zgjedhjet e parakohshme u shpallën pas dorëheqjes së kryeministrit Haradinaj. /Lajmi.net/