Kryetari i LDK-së thotë se mërgata mbetet shtylla më e fortë e angazhimit politik dhe u bën thirrje të dalin masivisht në zgjedhje.
Kryetari i Lidhjes Demokratike të Kosovës, Lumir Abdixhiku, ka zhvilluar një takim online me 84 nëndegë të LDK-së në mërgatë, ku ka thënë se mbështetja e tyre i ka dhënë energji dhe besim në prag të fundvitit politik. Ai theksoi se mesazhi më i shpeshtë që ka dëgjuar nga veprimtarët ishte: “Ju faleminderit që mbajtët fjalën”, të cilin e cilësoi si dëshmi se partia po ecën në drejtimin e duhur.
Abdixhiku u kërkoi të gjithë anëtarëve të mërgatës që të dalin masivisht më 28 dhjetor, duke besuar se angazhimi i tyre do të jetë përcaktues për rezultatin zgjedhor. “Mërgata gjithmonë vjen kur bëhet fjalë për Kosovën”, tha ai.
Ai kujtoi se në zgjedhjet e fundit lokale, mërgata e kishte bërë LDK-në forcën e parë politike, dhe se pret që të njëjtën mbështetje ta japin edhe këtë herë, “me zemër, me përgjegjësi dhe me vullnet për ndryshim”.
“Kosovës i duhet bashkimi ynë”, tha Abdixhiku, duke shtuar se 28 dhjetori do të jetë momenti ku “fjala bëhet votë dhe vota bëhet ndryshim”.
Në fund, ai falënderoi veprimtarët në mërgatë për angazhimin e tyre dhe i ftoi që të kontribuojnë në fitoren e LDK-së në zgjedhjet e ardhshme.
