Procesi Gjyqësor në dhomat e Specializuara në Hagë ndaj ish-krerëve të Ushtrisë Çlirimitare të Kosovës po hyn në fazat përfundimtare.
Kështu vlerësoi avokati Ardian Bajraktari, i cili thekson se pavarsisht zgjatjes së procesit dhe kohëzagjatjes së paraburgimit, dëshmitë e dhënë nga mbrojtja kanë qenë te besueshme dhe kanë ndihmuar në pasqyrimin e të vertetës.
“ Procesi, megjithëse i tejzgjatur, po shkon drejt fundit. Nga mesi i shtatorit, kur ka filluar dëgjimi i dëshmitarëve të mbrojtjes, dëshmitë kanë qenë jashtëzakonisht të besueshme dhe kredibile. Mbi të gjitha, ato kanë shpërfaqur mungesën e strukturës dhe hierarkisë së mirëfilltë komanduese të UÇK-së, gjë që bie ndesh me akuzat që rendojnë mbi ta”, deklaroi Bajraktari për GazetaBlic.
Sipas tij, provat e propozuara nga Prokuroria janë të diskutushme dhe me besueshmëri të ulët, ndërsa në disa raste edhe të pranuara në kundërshtim me dispozitat procedurale.
“Janë pranuar prova që rrjedhin nga një regjim që ka ushtruar gjenocid në Bosnjë e Kosovë, çka natyrisht e ulë kredibilitetin e tyre. Megjithatë, une besoj se trupi gjykues do tu japë peshë dëshmive të mbrojtjes, të cilat janë më të qendrueshmë dhe më afër realitetit”, tha ai.
Bajraktari shtoi se pret pafajësinë e ish-krerëve të UÇK-së, duke theksuar se dëshmitarët e mbrojtjes e kanë kundërshtuar fuqishëm tezën e të ashtuquajturës “Ndërmarrje e përbashkët kriminale” dhe akuzat për strukturë të organizuar komanduese.
“Në bindjen time, këto dëshmi e kundërargumentojnë fuqishëm dhe suksesshëm qëndrimin e Prokurorisë ”,tha ai.
Në lidhje me çështjen e paraburgimit, Bajraktari theksoi se vazhdimi i kësaj mase është në kundërshtim me praktikën e Gjykatës Evropiane për të Drejtat e Njeriut.
“Mbajtja e tyre në paraburgim është e papërputhshme dhe e pajustifikuar. Lista e dëgjimit të dëshmitarëve ka përfunduar që nga prilli, prandaj vazhdimi i kësaj mase është joproporcional dhe i pabazuar”, u shpreh ai.
Në fund, Bajraktari u shpreh optimist se vendimi përfundimtar do të përfundojë me lirimin dhe pafajësinë e ish-krerëve të UÇK-së.
“Unë besoj se fundi i këtij procesi do të sjellë rikonfirmimin e pastërtisë së luftës së UÇK-së dhe të pafajësisë së atyre që po ballafaqohen me akuza të padrejta”, përfundoi ai.
