“Po, fillimisht, arsyeja pse janë themeluar dhomat e specializuara dhe nevoja për të ndryshuar kushtetutën e Kosovës, pastaj për të bërë ligjin për dhomat e specializuara, ka qenë presion ndërkombëtar mbi raportin e Dick Marty dhe rezolutën e miratuar në Këshillin e Evropës që lidhet me shtëpinë e verdhë dhe trafikimin e organeve njerëzore. Krerët tanë janë marrë atje, edhe në fakt mbi dy vite kanë qëndruar aty në paraburgim. Po në fakt, asnjë normë juridike, as vendore, as ndërkombëtare nuk e lejon një gjë të tillë, sepse nuk mund t’i mbash njerëzit brenda më shumë se dy vite pa pasur verdikt final mbi çështjen e caktuar. Kjo është e para domethënë anomali që e kemi hasur”, vlerësoi ajo.

Sipas Hoxhës, procesi gjyqësor i nisur në vitin 2023 është shoqëruar me “anomali”, përfshirë përzierje kompetencash dhe mungesë reagimi institucional për pretendimet mbi shkelje të të drejtave të njeriut.

“E dyta pastaj, e kujtoj vitin 2023 kur ka nisur gjykimi, procesi i gjykimit zyrtarisht, atëherë e kemi pasur marshin e parë në fakt se ka qenë kjo kërkesa që të ketë drejtësi, sepse kemi parë që ajo për çfarë është themeluar gjykata, faktikisht, derisa vec filloi gjykimi zyrtar u shndërrua në një subjekt të mbyllur pa fakte dhe evidenca mbi atë se çka ka qenë shkas për dhomat e specializuara. Tutje kemi parë anomali të shumta, kemi parë përzierje kompetenca midis niveleve të gjykatave, një heshtje totale të ombudspersonit mbi shkeljen, mbi shkeljet e të drejtave njerëzore, mosprani të mjaftueshme edhe kushtimisht ta them, jo rezultate mbi proceset shtetërore vizavi Këshillit të Evropës, sepse nëse do të ishim sot pjesë e Këshillit, rruga për të adresuar këto shkeljet e të drejtave njerëzore, do të ishte shumë më e lehtë dhe më e thjeshtë në gjykatën evropiane për të drejtat e njeriut në Strasburg”, tha ajo.

Hoxha thekson se nuk dëshiron të paragjykojë procesin gjyqësor, por shton se beson në të vërtetën historike.

“Unë çkado që i shikoj, unë e shpalosa platformën mbi të cilën unë e kam argumentin tim dhe mendimet e mia. Nuk dua të spekuloj as nuk dua të gjykoj asgjë sepse nuk më takon, nuk vij nga fusha e tillë, por që unë besoj në të vërtetën tonë historike dhe besoj në dëshirën, nevojën dhe vullnetin e këtyre njerëzve të guximshëm që në kohë pa kohë kanë guxuar më shumë se të gjithë ne, për të dalë, për të luftuar, për të mbrojtur shtëpinë, familjet, kosovarët, tokat tona edhe shtëpitë tona edhe për të uruar dhe për të guxuar një ditë që të jemi të lirë dhe të pavarur. Prandaj as që dua të gjykoj në këtë drejtim”, u shpreh ajo.
Ajo theksoi se në një demokraci liberale pushtetet janë të ndara dhe politika nuk duhet të ndërhyjë në drejtësi.

Sipas saj, përpjekja për “gjykim në grup”, bie ndesh me parimet kushtetuese, pasi ligjet e Kosovës, siç theksoi, e njohin përgjegjësinë individuale dhe jo kolektive.

“Tash shikoni, në demokracitë liberale, ishte dashur që po të dëgjohet edhe zëri i popullit, po në demokracitë liberale janë shumë të ndara si me thikë pushtetet dhe nuk implikohet politika në gjyqësi. Edhe ne këtë e kemi kërkuar në fakt, që mos të implikohet politika dhe instrumentet politikë të shteteve të caktuara ose të njerëzve të cilët nuk ja duan të mirën Kosovës ose nuk duan ta shohin Kosovën të lirë dhe të pavarur, që të implikohen në procesin e drejtësisë. Dhe fakti që atje mundohet që të gjykohet në grup, është dëmi i parë, sepse ligjet tona nuk e ofrojnë një gjë të tillë sepse jetojmë në demokraci liberale ku individi dhe të drejtat e tij kushtetuese individuale vijnë, domethënë në nivelin parësor dhe veprat po ashtu gjykohet si e tillë në kuptimin individual, jo në kuptimin grupor. Kjo ndodh vetëm në shtetet dhe në sisteme totalitare. Prandaj këtu ka një diskrepancë midis asaj se çfarë thonë ligjet tona, kushtetuta jonë mbi të cilat është themeluar kjo gjykatë, pa çka që i është dhënë juridiksion dhe veprim ndërkombëtar në kuptimin edhe territorial por edhe të profesionalizmit”, u shpreh ajo.

Ajo e cilësoi si absurd faktin që vendimet jepen në emër të popullit, ndërsa protesta, sipas saj, ka synuar të përcjellë mesazhin “jo në emrin tim, jo në emër të popullit’.

“Po në anën tjetër, në fund gjykimet jepen në emër të popullit dhe ky është absurdi i llojit vet. Dhe protesta ka pasur vetëm një qëllim, e para të kërkoj drejtësi, dhe jo politikë, të mos, të mos i fusë duart aty politika dhe e dyta normalisht të përcjell këtë mesazh që jo në emrin tim, jo në emër të popullit, sepse ne e dimë kush janë ata njerëz, ne e dimë që qëllimi i tyre ka qenë mbrojtja e njerëzve, mbrojtja e Kosovës. Nuk kanë nxitur ata luftë, nuk kanë nxitur ata dhunë, nuk kanë shkuar në Serbi për të bërë dëme dhe dhunë edhe për të vrarë njerëz, kështu që ka një kontekst komplet të rrokullisur, të shkoqitur komplet prej rrethanave të 90-tave, thua se UÇK-ja ka qenë aparaturë shtetërore edhe juridike edhe komanduese edhe e armatosur, e që nuk është në fakt ai rast”, përfundoi ajo