Ish-kapiteni i FC Vushtrria, Daut Maxhuni, i është bashkuar zyrtarisht listës së PDK-së për Kuvendin Komunal të Vushtrrisë, në përkrahje të kandidatit për kryetar komune, Ferit Idrizi.
Kandidatura e Maxhunit u zyrtarizua nga vetë Idrizi, përmes një postimi ku theksohet roli i tij si një figurë e njohur dhe e respektuar në sportin lokal dhe në komunitet. “Sot nga fusha e gjelbër ku ai ka shënuar shumë super gola, e zyrtarizuam kandidimin e Daut Maxhunit në ekipin tonë”, ka shkruar Idrizi, duke e cilësuar si një emër që mishëron shpirtin sportiv dhe dashurinë për qytetin.
Me mbi dy dekada përvojë në futboll, Maxhuni është cilësuar si simbol i përkushtimit dhe udhëheqjes në sportin lokal. Përveç suksesit në fushë, ai njihet edhe për angazhimin e tij në komunitet dhe përkushtimin ndaj të rinjve dhe çështjeve që prekin sportin në qytet.
“Jam krenar që ai i bashkohet listës sonë për Kuvendin Komunal”, ka shtuar Idrizi, duke paralajmëruar edhe emra të tjerë që do t’i prezantojë në ditët në vijim, në funksion të ndërtimit të një Vushtrrie më të fortë dhe me më shumë fokus tek rinia dhe sporti.
