Kllokoqi i kundërpërgjigjet Kryeziut

Kreu i Gastronomëve të Kosovës, Petrit Kllokoqi po insiston se videoja e publikuar sot në njërën nga bufet në Qeverinë e Kosovës ka qenë i mbushur me një numër të konsiderueshëm i njerëzve, të cilët janë ulur nëpër karrige e po shërbehen me pije e ushqim.

Kjo video u demantua nga zëdhënësi i Qeverisë, Përparim Kryeziu, i cili tha se s’ka asnjë njeri ulur dhe karriget janë vendosur në pozicion të papërdorshëm. Madje ai ia bashkangjiti edhe disa fotografi të bufesë.

Por, Kllokoqi thotë se bufeja që sot ka qenë e mbushur ku edhe është inicizuar videoja, është në Ministrinë e Mjedisit dhe Infrastrukturës.

“Qeveria e Kosovës ka 15 Ministri gjithsej. E njëra nga to është edhe Ministria e Mjedisit dhe Infrastrukturës, prej nga ka rrjedh edhe video e publikuar sot. Në videon e publikuar nga burimet tona dhe në fotot e publikuara si arsyetim nga disa, shihet qartë se shkallet nuk janë të njëjta, as pllakat, e as karrikat. Nga burimet tona edhe Byfe-ja në objektin e Rilindjes ka qenë e hapur. Ndoshta në Kryeministri paska qenë e mbyllur”, shkroi Kllokoqi.