Policia e Kosovës ka ndaluar një person të dyshuar për falsifikim dokumentesh gjatë një kontrolli rutinë në Mitrovicë të Veriut. I dyshuari, shtetas kosovar, ishte me urdhërarrest aktiv për veprën penale “Falsifikim i dokumenteve”.
Sipas njoftimit zyrtar të Policisë, gjatë ndalimit ai ishte prezantuar me një identitet tjetër. Zyrtarët policor, përmes vigjilencës, kanë identifikuar se letërnjoftimi me të cilin ishte prezantuar dyshohet të jetë i falsifikuar. Po ashtu, gjatë kontrollit ndaj tij është gjetur edhe një patentë shoferi e falsifikuar.
Lidhur me rastin është njoftuar prokurori kompetent, i cili ka udhëzuar inicimin e rastit për veprën penale “Falsifikim i dokumenteve” sipas nenit 390 të Kodit Penal. Gjithashtu, janë duke u zhvilluar hetime për dyshime lidhur me kryerjen e veprës penale “Vjedhje e identitetit dhe kredencialeve” sipas nenit 277H të ligjit 08/L-188.
Dokumentet e dyshuara për falsifikim janë konfiskuar, ndërsa i dyshuari është intervistuar nga hetuesit e NJRHKEK – Mitrovicë Veri dhe me vendim të prokurorit është dërguar në mbajtje për 48 orë.
