Nis protesta e banorëve të fshatrave të Artakollit të Vushtrrisë (FOTO)

Banorë të mbi dhjetë fshatrave të Artakollit të Vushtrrisë, kanë protestuar sot në fshatin Druar për problemet që po kanë në qarkullim dhe ndotjen e madhe nga rruga që po punohet tani e një kohë të gjatë, raporton Gazeta online Veriu.info.

‘Përmes kësaj proteste ne banorët e zonës kemi kërkuar nga Qeveria e Kosovës, përkatësisht Ministria e Infrastrukturës dhe transportit që të financoj shtrimin së paku të shtresës së parë të asfaltit, ndryshe jeta për ne është bërë e padurueshme për shkak të pluhurit të madh por edhe për shkak të gropave nëpër rrugën me zhavorr’, i ka thënë Gazetës Veriu.info Agron Lushaku kryetar i Këshillit të fshatit Nevolan që ishte ndër organizatorët e kësaj proteste.

Protestuesit i kanë vënë ultimatum qeverisë se nëse nuk ndërmerr veprime të shpejta për ta zgjidhur këtë problem, ata do të radikalizojnë protestën e tyre, me bllokim të rrugës nacionale Prishtinë-Mitrovicë.

Ndryshe që nga pranvera e këtij viti ka filluar ndërtimi i rrugës rajonale Bukosh –Prelluzhë diku afër 15 kilometra e gjatë, që njihet si rruga alternative Mitrovicë-Prishtinë dhe që lidh afër 20 fshatra të Vushtrrisë me qytetit por edhe me Obiliqin e Prishtinën.

Punëkryesi e ka hapur gjithë trasenë e kësaj rruge të cilën e ka shtuar me zhavorr, e që nuk është duke vazhduar ende me punët asfaltit. /Veriu.info/

Shihni më poshtë fotot e gjendjes së kësaj rruge: