Prokurori i dorëhequr Elez Blakaj provokon me një foto nga Amerika

Protagonist i javës, ish-prokurori special, Elez Blakaj, i cili dha dorëheqje nga pozita e tij,po qendron në Amerikë. Nga atje ai ka publikuar një fotografi në Shtëpinë e Bardhë, ndërsa në Kosovë edhe më tutje po vazhdon debati për tërheqjen e njeriut që përgatiti aktakuzën ndaj atyre që dyshohet se frynë listat e veteranëve deri në 60 mijë veta.
Dorëheqja e ish-prokurorit Elez Blakaj shënon kryetemën e kësaj jave. La një letër të dorëheqjes dhe u tërhoq komplet, pa iu përgjgijur asnjë reagimi. Prokurori që po hetonte mashtrimet në listat e veteranëve nuk po gjendej më as në Kosovë.

Blakaj ka shkuar në Amerikë menjëherë pasi dha dorëheqje nga pozita e Prokurorit Special.

Asnjë përgjigje nga protagonisti, ndërsa në profilin e tij në Facebook, Blakaj ka publikuar një fotografi nga Shtetet e Bashkuara të Amerikës, transmeton Gazeta Express.

Dorëheqja e Blakajt u stërkomentua. Fillimisht u tha se ai u largua pas kërcënimeve që ka marrë gjatë hetimeve të tij për fryerjen e listave të veteranëve.

Para se të jepte dorëheqje, ish-Prokurori kishte lënë të gatshme aktakuzën për Komisionin qeveritar për verifikimin dhe njohjen e statusit të veteranit.

Aktakuza e përgatitur nga Blakaj, e dorëzuar te kryeprokurori Aleksander Lumezi nuk është ngritur akoma.

Të akuzuar janë në aktakuzën, që u publikua të premten në Kohën Ditore janë: Agim Çeku, Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj, Xhavit Jashari.

Për kërcënimet që ka marrë Blakaj, ka folur edhe kryeprokurori Lumezi. Kjo thuhej se është arsyeja pse ish-prokurori la detyrën e tij.

Se Blakaj ishte prej të preferuarve të amerikanëve, tregoi edhe reagimi i Ambasadës Amerikane, menjëherë pas dorëheqjes së tij, shkruan Gazeta Express.

Ambasadori Greg Delawie e konsideronte ditë të kobshme për sistemin e drejtësisë në Kosovë tërheqjen e ish-prokurorit që po hetonte mashtrimet në listat e veteranëve.
Blakaj po ashtu kishte marrë përkrahje nga Qeveria amerikane për studimet e masterit në SHBA.

“Ai kishte përkrahjen e Qeverisë amerikane të kryente studimet për master në fushën e drejtësisë dhe hulumtoi raste të rëndësishme në Kosovë. Kosova duhet të dëshmojë përpjekjen e vet në sistemin e drejtësisë, jo vetëm duke i përkrahur prokurorët, por edhe t’i mbrojë të gjithë ata që duan të shërbejnë në detyrën e tyre”, thuhej në reagimin e ambasadës amerikane.

Aktakuza e prokurorit të dorëhequr është bllokuar në Prokurorinë Speciale. Ende nuk është dërguar në Gjykatë pavarësisht se posa prokurori të nënshkruan një aktakuzë e njëjta duhet të përcillet për në institucionin që ndan drejtësinë.

Në ditën kur u dha lajmi se është dorëhequr prokurori, institucioni i akuzës lëshoi një njoftim se ka vetëm hetime por jo edhe aktakuzë për mashtruesit e statusit të veteranit. Pastaj, u tha se ka draftakuzë, një përkufizim që s’është i njohur në Kodin Penal, dhe se drafti i aktakuzës është vetëm derisa Prokurori e ka të panënshkruar aktakuzën.
Sidoqoftë, dëmi që i bëhet Shtetit, sipas aktakuzës së nënshkruar nga Prokurori i dorëhequr, është afër 40 milionë euro në vit.

Pas kësaj aktakuze pritet që e njëjta të zgjerohet dhe të merren Prokuroritë Themelore. Pritet të dalin para gjyqit edhe veteranët mashtrues, të cilët do të detyrohen t’i kthejnë të gjitha mjetet e vjedhura të Shtetit. Madje, nëse nuk kanë të holla, Shteti mund t’ua konfiskojë edhe pasuri për eurot e shtetit që kanë zhvatur.

Sipas kësaj aktakuze, 38 milionë e 882 mijë e 400 euro për një vit i kushtojnë buxhetit të shtetit 19.060 ”veteranët e rrejshëm”, të cilët i ka identifikuar prokurori special i dorëhequr ditë më parë, Elez Blakaj.

=