Punëtorët e Radio Televizionit të Kosovës kanë ngritur alarmin për gjendjen e rëndë ekonomike në të cilën janë zhytur, pasi afro 700 familje kanë mbetur pa të ardhura për shkak të vonesave në paga. Në një reagim, ata denoncojnë faktin se ndërkohë që institucionet shtetërore flasin për rritje pagash, vetë punëtorët e RTK-së nuk kanë marrë as pagesat bazë që u takojnë me ligj.
Në reagim theksohet se RTK është pjesë e vetë shtetit të Kosovës dhe se punëtorët e saj janë kontribuues të rregullt të buxhetit publik. Për këtë arsye, kërkojnë ndërhyrje urgjente nga institucionet përgjegjëse për të zgjidhur krizën.
Sindikata e Punëtorëve të RTK-së paralajmëron se nëse brenda një periudhe të shkurtër nuk ndërmerret asnjë veprim konkret, do të fillojnë protestat, të cilat mund të përshkallëzohen në grevë të përgjithshme dhe bojkot të çdo aktiviteti publik në vend.
