Katër persona kanë terrorizuar punëtorët dhe pronarin e postës së shpejt “Mik Mik” në fshatin Mazgit të Obiliqit, mbrëmë pak para mesnatës. Sinjali mëson së bëhet fjalë për një tentim grabitje që u krye në objektin e biznesit, nga katër persona të armatosur.
Burimet e Sinjalit brenda Prokurorisë kanë bërë të ditur se të dyshuarit kishin hyrë në objekt të maskuar, dy prej të cilëve kanë pasur edhe armë të gjata, ndërkaq të tjerët mjete të forta, me ç’rast janë ballafaquar me stafin që u doli përpara.
Pasi ‘plani’ s’u shkoi siç duhet, të dyshuarit janë larguar nga objekti pa kryer grabitjen, por njëri prej tyre, gjatë ikjes ka shkrepur në drejtim të objektit, por fatmirësisht s’ka persona të lënduar.
Hajnat janë larguar me një veturë, e cila më pas, siç mëson Sinjali është gjetur e djegur në autostradë, teksa Policia ka intervenuar dhe ka dalë në vendin e ngjarjes, ku janë mbledhur prova, duke përfshirë edhe pamjet e kamerave të sigurisë.
Burimet thonë se nga pronari i postës është konfiskuar një armë dhe dhjetëra fishekë që dyshohet se i njëjti e ka ekspozuar gjatë përballjes me të dystuarit.
Lidhur me rastin, Policia ende s’i ka identifikuar e as kapur të dyshuarit, por hetimet në këtë drejtim kanë nisur me urdhër të Prokurorit të Shtetit.