Një 20-vjeçar shqiptar është arrestuar në Modena nga policia italiane, i akuzuar për trafik dhe posedim të lëndëve narkotike. Në banesën e tij, karabinierët gjetën dhe sekuestruan katër pako hashash, me një peshë rreth 300 gramë, shtatë pako me 10 gramë kokainë secila, si dhe 920 euro në para të gatshme.
Në vendin e ngjarjes u zbuluan gjithashtu një peshore precize, një thikë me mbetje të substancave narkotike dhe pajisje për paketim dhe shpërndarje. Emri i të riut nuk është bërë publik, ndërsa hetimet vazhdojnë për të identifikuar personat e tjerë të përfshirë. Lëvizjet e dyshimta të të dyshuarit, i cili është i papunë, zgjuan dyshimet e autoriteteve.
20-vjeçari u paraqit në gjykatë mëngjesin e 24 tetorit, ku gjykata e Modenës vendosi për të masën e detyrimit të përditshëm të paraqitjes në polici.
