Sot katër vjet më parë në fazën grupore të Kupës së Botës përballeshin Serbia me Zvicrën, ku në fund me golat e shënuar nga dy kosovarët, Granit Xhaka dhe Xherdan Shaqiri, helvetikët shënuan fitore shumë të rëndësishme për vazhdimin e garave.
Ndeshja nuk kishte filluar edhe shumë mirë, pasi vetëm pas pesë minutave për serbët golin e epërsisë e realizoi sulmuesi, Aleksandar Mitrovic, dhe me avantazhin e një goli serbët në dhomat e zhveshjes shkonin të relaksuar.
Në pjesën e dytë ishte diçka tjetër, ku tani ishte Zvicra e cila kishte marrë në dorë lojën dhe kontrollonte gjithçka, derisa pas vetëm shtatë minutave me një goditje të fortë nga jashtë zone ishte Granit Xhaka, i cili realizoi golin e barazimit.
Përveç Xherdan Shaqirit shumë njerëz menduan dhe u bënë gati që ndeshja do të përfundonte me rezultat të barabartë, mirëpo ishte mesfushori nga Zhegra e Gjilanit, i cili shënoi në minutën e fundit ndoshta golin më të rëndësishëm në karrierë.
Ai gol përveç që gëzoi popullin zviceran, bëri edhe mijëra shqiptarë në mbarë botën të shpërthejnë nga gëzimi, ku si te Xhaka ashtu edhe te Shaqiri gjesti që bënë me shqiponjën në duar ishin momente të veçanta dhe të krenarisë.
Për ironi të fatit Zvicra përsëri në Botërorin e Katarit do të përballet kundër Serbisë dhe kjo sfidë do të luhet më 2 dhjetor në Doha, me gjasë serbët do të synojnë hakmarrjen pas asaj që ndodhi në Rusi, por do ta kenë shumë të vështirë. /gazetametro.net
