Kohë pas publikimit, seriali “Rrushe” është bërë tema pothuajse më e komentuar ditëve të fundit, teksa e gjitha erdhi si rezultat i transmetimit të këtij prodhimi nga Top Channel bashkë me titra shqip-shqip.
Ky veprim u kritikua masivisht në mediat sociale kryesisht nga shqiptarët e Kosovës, por njëra ndër aktoret e kastit e ka zbuluar arsyen që qëndron pas titrimit.
Aktorja e “Rrushe”, Doresa Rexha përmes një komenti në Facebook ka zbuluar se seriali ishte transmetuar me titra edhe në Kosovë dhe se kjo ishte bërë enkas për audiencën me aftësi të kufizuara, ekzaktësisht për shurdhmemecët.
“Sa për informacion, ‘Rrushe’ ka qenë e titruar edhe gjatë transmetimit në televizion të Kosovës. Arsyeja se pse kemi vendosur që të kemi titra është për shkak që kur e kemi transmetuar para dy viteve, kemi marrë falënderim nga Shoqata e Shurdhmemecëve pasi që kanë pasur mundësi ta përcjellin serialin, andaj për të njëjtën arsye kemi vendosur bashkarisht me Top Channel që edhe atje të ketë titra”, ka shkruar aktorja.
