Eraldo Musteqja 26 vjeç është autori i dy zjarrvënieve në lokalin e reperit të njohur Rigels Rajku, i njohur me emrin e artit si Noizy. Musteqja i afërm të familjes Rajku është arrestuar mëngjesin e kësaj të enjtjeje.
Lokali ‘Zins’, që ndodhet në zonën e Currilave në Durrës dhe që ishte rihapur vetëm dy ditë më parë, i është vënë flaka në verandë, në orët e para të mëngjesit. Kushëriri i Noizyt është autor i zjarrvënies në 11 qershor dhe po ashtu i një zjarrvënie të mëparshme në banesën e këngëtarit.
Lidhur me ngjarjen ka reaguar edhe vetë këngëtari, i cili ka dhënë detaje në lidhje edhe me shkakun që e kanë çuar kushëririn e tij që ti vërë flakën pronave të tij. Noizy thotë se Eraldo është rritur nga familja e tij që në fëmijëri dhe se ka ndërruar fenë, ndërsa shton se është bërë besimtar ekstremist.
Sipas asaj që shkruan Noizy, ai kishte besime të forta se lokalet s’duhet të shesin alkool dhe se muzika është haram, prandaj vendosi që të bëjë këtë akt terrorist. Megjithatë shkruan Noizy, ai shpreson që Eraldo të bëhet më mirë dhe të kuptoj gabimin ndërsa shton se s’mund ta urrej por i ka lënë në dorë gjithçka Zotit.
“Ky është Eraldo, i rritur nga familja ime qe në fëmijëri, Eraldo ndërroi fe, u bë një besimtar ekstremist, dhe kishte besime të forta se lokalet s’duhet të shesin alkool dhe se muzika është haram. Prandaj vendosi që të bëjë atë akt terrosit. Gjithsesi jeta vazhdon, unë dhe familja ime jemi të gjithë mirë. Uroj që Eraldo të bëhet më mirë dhe të kuptojë gabimin. Unë s’mund ta urrej sepse jam rrit me të, ia kam lënë në dorë Zotit dhe drejtësisë. The beautiful @zins_durres është shumë mirë dhe përherë do të jetë mirë. Ziliqar dhe keqbërës do të ketë përherë, por varet sa i fortë qëndron ti dhe se si e menaxhon situatën. Love you lil bro”, shkruan Noizy.
