E Ngarkuara me Punë e ShBA-së në OSBE, Katherine Brucker, në fjalën e saj në Këshillin e Përhershëm të këtij misioni në Vjenë, ka thënë se normalizimi mes Kosovës dhe Serbisë duhet të përfundojë me njohjen reciproke.Këto komente, Brucker i ka bërë në përgjigje të raportit të Cornelia Taylor, Ushtruese Detyre e Shefit të Misionit të OSBE-së në Kosovë.
“Shtetet e Bashkuara e mbështesin Kosovën si një demokraci sovrane, multietnike dhe u kërkon liderëve të saj që të promovojnë një shoqëri që respekton të drejtat dhe gjithëpërfshirëse për të gjithë ata që jetojnë në Kosovë. Normalizimi i marrëdhënieve ndërmjet Kosovës dhe Serbisë përmes Dialogut të lehtësuar nga BE-ja, siç është rënë dakord nga të dyja vendet, është thelbësor për stabilitetin dhe prosperitetin rajonal. Në fund të fundit, Shtetet e Bashkuara besojnë se normalizimi duhet të përfundojë me njohjen reciproke ndërmjet Kosovës dhe Serbisë, pasi të dyja kërkojnë të realizojnë aspiratat e tyre për në BE”, ka deklaruar Brucker, raporton Klankosova.Përfaqësuesja e ShBA-së në OSBE tutje shprehur dëshirën e saj të fortë që Kosova të bëhet pjesë e kësaj organizate.
“Mbetemi të bindjes së fortë se është për të ardhur keq që Kosova nuk është shtet pjesëmarrës i këtij organi dhe për këtë arsye nuk është në gjendje të flasë vetë para këtij organi. Mezi presim ditën kur kjo mund të ndodhë”, potencoi Brucker.Ndër të tjera, ajo shprehu shqetësimin e ShBA-së për mbarëvajtjen e Misionit të OSBE-së në Kosovë, “për shkak të kufizimeve të rënda financiare”.
Ajo kritikoi shtetet pjesëmarrëse për “paaftësi” për të arritur konsensus mbi një buxhet të unifikuar. Kjo situatë, tha Brucker, ka vënë në presion të panevojshëm aftësitë e të gjitha misioneve në terren për të kryer me efektivitet mandatet e tyre, duke dëmtuar gjithçka, nga personeli dhe burimet deri te zbatimi i programit.Brucker u bëri thirrje të gjitha shteteve pjesëmarrëse të miratojnë Buxhetin e Unifikuar sa më shpejt të jetë e mundur.
