Policia e Kosovës, njësiti FAST Kosova, në asistim me FIT-in, ka arrestuar sonte në Mitrovicë një person i cili po kërkohej me urdhër arrest ndërkombëtar nga shteti gjerman.
Gazeta Online Veriu.info mëson se i dyshuari që u arrestua është 27-vjeçari Granit Vallqi, i kërkuar nën dyshimin për kryerjen e veprave penale “Vrasje” dhe “Grabitje”.
Vallqi dhe një person tjetër dyshohen për vrasjen e një 85-vjeçari në Gjermani, më 7 shtator të vitit 2023.
Veriu.info mëson se personi i dytë i dyshuar për vrasjen e 85 vjeçarit në Gjermani është Hassan Issa, i moshës 28 vjeçare.
Policia gjermane ngarkon Vallqin dhe Issan për vrasjen brutale të personit në Gjermani.
Shteti gjerman ka vënë edhe shpërblim prej 30 mijë euro për ata që tregojnë gjurmë që çojnë në arrestimin e personit të kërkuar.
Lajmi për arrestimin e Vallqit është konfirmuar edhe nga Policia e Kosovës.
“Me urdhër të Prokurorit Kujdestar për Krime të Renda i dyshuari tani më i arrestuar, me iniciale (G. V.) viti i lindjes (1997) dërgohet në ndalim policor për 48 orë për të vazhduar me procedura tjera të parapara për raste të tilla.
Policia e Kosovës mbetet e përkushtuar në realizimin e detyrave dhe autorizimeve ligjore në parandalimin dhe luftimin e të gjitha llojeve të krimit, përderisa angazhime aktive janë duke u realizuar dhe do të realizohen në vazhdimësi edhe në fushën e bashkëpunimit policor ndërkombëtar.”
