Kryetari i Këshillit të Kongresit të Intelektualëve Boshnjakë të Kosovës, profesori universitar Mejdin Saliji, e konsideron vendimin e Qeverisë së Kosovës për heqjen e njëanshme të vizave nga 1 janari 2025, gjegjësisht lejimin e hyrjes dhe lëvizjes së lirë të qytetarëve të Bosnjës dhe Hercegovinës vetëm me letërnjoftim, të justifikuar, me shpresën se Bosnja dhe Hercegovina do të ndjekë të njëjtin shembull, shkruan etto.ba, transmeton Express.
Ai rikujton se kjo çështje ka qenë aktuale për disa vite, dhe se qytetarët dhe Qeveria e Republikës së Kosovës nuk kanë pasur qëllim që të pengojnë qarkullimin e njerëzve, mallrave dhe shërbimeve.
“Qeveria e Kosovës, politikanët, shoqëria civile, intelektualët po bëjnë gjithçka që shteti i Bosnjë-Hercegovinës të respektojë reciprocitetin dhe t’u mundësojë qytetarëve të Kosovës të udhëtojnë pa viza – ka deklaruar Saliji.
Ai thekson se BeH nënshkroi marrëveshje brenda Procesit të Berlinit që qytetarët e të dy vendeve udhëtojnë pa viza dhe se të gjitha vendet janë të detyruara ta ratifikojnë atë marrëveshje në parlamentet e tyre, por Bosnja dhe Hercegovina nuk e bëri kurrë këtë për Kosovën.
“Kuvendi i Kosovës ratifikoi menjëherë marrëveshjet. Mirëpo, kryeministri i Kosovës, Albin Kurti, ka bërë të ditur se do të hiqen vizat dhe se qytetarët e BeH mund të udhëtojnë me letërnjoftim nga 1 janari 2025, pavarësisht nëse BeH do ta bëjë të njëjtën gjë” – thotë Saliji.
“Topi tani është në fushën e BeH-së”, thekson ai, dhe sipas tij BeH është ajo që duhet të zbatojë reciprocitetin adekuat ndaj qytetarëve të Kosovës dhe të respektojë obligimet e marra.
Ai beson se ndërmjetësues në këtë rast mund të jenë Delegacioni i Bashkimit Evropian në Kosovë dhe ambasadat e shteteve të Kuintit, duhet të rrisin presionin ndaj Bosnjë-Hercegovinës në të gjitha ngjarjet ndërkombëtare dhe t’i kushtëzojnë rrugën drejt BE-së, që pa marrë përsipër detyrimet në lidhje me ratifikimin e marrëveshjes, nuk është e mundur të ecet përpara drejt integrimeve euroatlantike dhe të vendosë sanksione, veçanërisht ndaj subjektit të “Republika Srpska”, që po bllokon procesin dhe nuk lejon ratifikimin e marrëveshjes.
“Po ashtu, politikanët boshnjakë dhe kroatë nga Bosnja dhe Hercegovina duhet ta përfshijnë këtë çështje në funksionimin e koalicionit shtetëror, si dhe t’i kushtëzojnë politikanët nga RS që këtë çështje ta vënë në rend dite, sepse nga kjo nuk përfitojnë vetëm qytetarët, por edhe shteti i Bosnjës dhe Hercegovinës, duke përfshirë entitetin e RS-së mbi të gjitha, – thotë Saliji.
Shteti i Serbisë, kujton ai, i ka lejuar qytetarët e Kosovës që të udhëtojnë me letërnjoftime të Kosovës pa ua njohur shtetësinë, dhe Bosnja e Hercegovina ende nuk mund ta bëjë këtë gjë që është absurde.
