Albin Kurti në dhjetor u zgjodh kandidat i Lëvizjes Vetëvendosje për kryeministër në zgjedhjet e ardhshme parlamentare më 9 shkurt.
Kreu i kësaj partie që nuk ka pasur asnjëherë kandidat tjetër për kryeministër, tha sot në një intervistë për KosovaPress se partitë opozitare “nuk janë reformuar”.
“Ne nuk shohim mundësi që të kemi koalicione paszgjedhore prandaj edhe i kemi bërë ato parazgjedhore, së pari me partinë Guxo dhe gjithashtu me partinë Alternativa, me të cilët kemi bashkëqeverisur në këto katër vjet dhe i kemi përvojat dhe mbresat më të mira nga njëri-tjetri. Partitë që kanë qenë gjatë në qeverisje në Kosovë për dy dekada, nganjëherë dy prej tyre, nganjëherë të trija bashkë, PDK, LDK dhe AAK, në këto katër vite unë nuk kam parë që janë reformuar dhe kur e kemi parasysh se, sidomos në muajt e fundit, sulmet që janë bërë ndaj subjektit tonë politik, ndaj eksponentëve të subjektit tonë politik, ndaj qeverisjes sonë të mirë e demokratike, nuk shohim mundësi që të kemi çfarëdo koalicioni në mandatin tjetër, për më tepër që nuk do të jetë as i nevojshëm”, tha Kurti.
Me vetbesimin që e mori nga zgjedhjet e 14 shkurtit 2021, me të cilin mburret ende, Kurti shpreh dëshirën të marrë edhe më shumë vota këtë herë, me një kërkesë direkte për njerëzit: 500 mijë vota.
Partia e Kurtit është etiketuar si ajo më pak demokratikja, në kuptimin e udhëheqësve në krye të saj.
Me përjashtim të një trevjeçari kur në krye të LVV-së kishte qenë Visar Ymeri, në gjithë pjesën tjetër, Kurti vetë ishte në krye të partisë. 17 vjet!
Askush s’e kundërshton. Kur u zgjodh kandidat i LVV-së për kryeministër, bashkpartiakët e lartësuan.
Kryesuesja e Këshillit të Përgjithshëm të LVV-së, Arbërie Nagavci thoshte se të gjithë të pranishmit votuan pro kandidaturës së Kurtit, megjithëse thoshte se ishte “e detyruar”, për shkak të rregullave, të pyeste nëse kishte abstenim ose a është dikush kundër.
Dy partitë më të mëdha opozitare, LDK-ja dhe PDK-ja, i ndërruan udhëheqësitë e tyre para pak vjetësh.
