Komisioni Qendror i Zgjedhjeve (KQZ) është duke bërë vlerësimin e pakove me fletëvotime nga votimi jashtë vendit, përkatësisht nga votimi përmes postës.
Zëdhënësi i KQZ-së, Valmir Elezi, në një prononcim për Indeksonline ka bërë të ditur se deri më tani janë refuzuar mbi 4 mijë vota, ku njoftoi se arsyeja e refuzimit të këtyre votave është se mungon dëftesa e regjistrimit.
“Nga data 9 shkurt, kur ka filluar vlerësimi apo verifikimi i pakove me fletëvotime nga votimi jashtë Kosovës dhe deri më 22 shkurt, këtij procesi i janë nënshtruar 60,997 pako, prej të cilave janë aprovuar 56,947 ndërkaq janë refuzuar 4,050. Arsyeja se përse janë refuzuar këto dërgesa, është se ato janë janë dërguar nga persona që janë anuluar gjatë regjistrimit si votues jashtë Kosovës; u mungon dëftesa e regjistrimit; janë dërguar më shumë se një herë; kanë dërguar më shumë se një fletëvotim; etj.”, ka thënë Elezi.
Elezi, njoftoi se mbi 15 mijë qytetarë kanë votuar në përfaqësi diplomatike ndërsa përmes postës 69 mijë pako me fletëvotime.
“Në përgjithësi, gjatë periudhës së regjistrimit, nga 104,924 shtetas të regjistruar për votim jashtë Kosovës, 84,600, ishin regjistruar për të votuar përmes postës dhe 20,324 të tjerë ishin regjistruar për votimin fizik në përfaqësitë diplomatike.
Nga 20,324 në përfaqësi diplomatike kanë votuar 15,352 votues, ndërkaq në votimin përmes postës KQZ ka pranuar rreth 69 mijë pako me fletëvotime”, tha Elezi për Indeksonline.
Ndërkaq, numri i qytetarëve që kanë votuar me kusht është mbi 12 mijë dhe nga java e ardhshme do ti nënshtrohen verifikimit.
“Numri i zarfeve me fletëvotimeve nga vendvotimet me kusht është 12,801, të cilat gjithashtu do t’i nënshtrohen verifikimit, i cili përfshin krahasimin me listën e votuesve të nënshkruar në vendvotime të rregullta. Ndërkaq, numri i votave të personave me nevoja të veçanta është: 2,597 vota”, ka shtuar Elezi për Indeksonline.
Elezi, njoftoi se të shtunën në QNR ka filluar skanimi i listës së votuesve të nënshkruar në 2,533 vendvotime të rregullta në ditën e zgjedhjeve, pasi sipas tij kjo ndihmon që të sigurohemi se askush nuk ka votuar dy here.
“Skanimi i listës së votuesve të vendvotimeve të rregullta është i domosdoshëm para se të fillojmë me numërimin e votave nga vendvotimet me kusht, sepse na ndihmon që të sigurohemi se askush nuk ka votuar dy herë, në vendvotimin e rregullt dhe në vendvotimin me kusht.
Pasi të kryhen këto procese, do të mund të fillojë numërimi i votave me kusht, votave të personave me nevoja të veçanta dhe votave nga votimi jashtë Kosovës”, tha Elezi./IndeksOnline/
