Mosmarrëveshjet mes qytetarëve të cilat nuk arrijnë të zgjidhen me fjalë, shpesh herë eskalojnë në përleshje e dhunë fizike, duke lënë edhe persona të lënduar rëndë. Nuk janë të rralla rastet kur këto sulme fizike ndodhin edhe mes kushërinjve apo familjarëve, për lloj-lloj motivesh. Një rast i tillë ka ndodhur së fundmi në Prishtinë, ku dy vëllezër e kanë rrahur brutalisht një familjar të tyre dhe më pas kanë përfunduar në pranga.
Sinjali mëson ekskluzivisht se të arrestuarit në lidhje me këtë rast janë Ermal Rexhepi (rreth 41-vjeçar) dhe Rizah Rexhepi (rreth 39-vjeçar).
Rasti ka ndodhur të hënën në rrugën “Perandori Justinian”, ku një burrë rreth moshës 51-vjeçare, ka pësuar lëndime serioze, pasi është sulmuar brutalisht nga dy familjarët e tij.
Burimet e Sinjalit kanë bërë me dije se viktima ka deklaruar në Polici se të dyshuarit fillimisht e kanë goditur me një shufër metalike, ndërsa më pas e kanë sulmuar me shqelma e grushta, duke i shkaktuar lëndime të rënda trupore.
Mënjëherë pas raportimit të rastit, Policia ka arritur t’i arrestojë të dyshuarit, të cilët pas intervistimit janë dërguar në mbajtje.
Organet kompetente po vazhdojnë hetimet në lidhje me zbardhjen e rrethanave të rastit.
Sinjali do të iu mbajë të informuar për vazhdimësinë e kësaj ngjarjeje.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
