Qytetarët e Kosovës nuk duhet të mësohen të tërheqin para nga kursimet e tyre pensionale sa herë që kanë vështirësi, tha deputeti i Lëvizjes Vetëvendosje, Armend Muja.
Sipas tij, skema pensionale nuk mund ta zëvendësojë politikën fiskale, prandaj ai thotë se Vetëvendosje është kundër kësaj tërheqjeje.
“Ne këtë propozim e kundërshtojmë për shkak se skema pensionale nuk mund të jetë mekanizëm dhe ta zëvendësojë politikën fiskale. Logjika jonë është që Qeveria duhet të jetë aty t’i ndihmojë qytetarët në rast se ata kanë nevojë. Por, jo duke i mësuar ata që çdo herë që kanë ndonjë vështirësi të tërheqin para nga “xhepi”. Kjo është parimore për ne”, tha ai në emisionin “Këndi i Debatit” në Tëvë1.
Kuvendi i Kosovës sot ka dështuar sërish të hedh në votim shqyrtimin e parë të projektligjit përmes të cilit synohet të lejohet tërheqja e 30 për qind të mjeteve nga Fondi Pensional.
