Tensionet mes Izraelit dhe Iranit kanë hyrë në një fazë të re përshkallëzimi të dhunshëm, me sulme ajrore reciproke që kanë shkaktuar viktima dhe dëme të mëdha në të dyja vendet.
Sipas autoriteteve izraelite, të paktën tetë persona kanë humbur jetën dhe mbi 140 janë plagosur pas një vale sulmesh me dronë dhe raketa të lëshuara nga Irani gjatë natës, raporton CNN.
Viktimat në Izrael variojnë nga mosha 10 deri në 80 vjeç, ndërsa goditja më e rëndë ndodhi në qytetin bregdetar Bat Yam, ku një ndërtesë u shkatërrua plotësisht, duke lënë të paktën katër të vdekur. Sulme të tjera u raportuan edhe në qytetin Tamra, me katër viktima shtesë.
Në kundërpërgjigje, Izraeli ka kryer një sërë goditjesh ajrore në Teheran, përfshirë selinë e Ministrisë së Mbrojtjes së Iranit dhe objekte të lidhura me programin bërthamor të vendit. Ministri izraelit i mbrojtjes publikoi një mesazh në rrjetet sociale: “Teherani po digjet”. Ndërkohë, agjencia shtetërore iraniane IRNA konfirmoi se një depo nafte dhe një rezervuar karburanti u goditën, duke shkaktuar një zjarr të madh, por situata thuhet se është “nën kontroll”.
Ndërsa numri i viktimave nga sulmet izraelite gjatë ditëve të fundit në Iran mbetet i paqartë, autoritetet iraniane kanë njoftuar më herët se të paktën 78 persona janë vrarë.
Një zyrtar i Izraelit tha për CNN se operacioni kundër Iranit pritet të zgjasë “javë, jo ditë”, me mbështetje të heshtur nga administrata e presidentit amerikan Donald Trump. Zyrtarë të Shtëpisë së Bardhë kanë konfirmuar se janë të informuar dhe e kanë mbështetur në heshtje planin izraelit.
Kryeministri izraelit Benjamin Netanyahu, në një fjalim televiziv, u zotua se Izraeli do të vazhdojë operacionin “derisa të eliminohet kërcënimi bërthamor iranian”.
Ndërkohë, Irani ka paralajmëruar për përgjigje të mëtejshme nëse sulmet nuk ndalojnë. Gardat Revolucionare kanë kërcënuar me intensifikim të veprimeve ushtarake, duke theksuar se “nuk kanë zgjidhje tjetër përveçse të përgjigjen”.
