Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë pakënaqësitë e tyre kalojnë në kërcënime, duke ua vështirësuar kështu punën e madje duke ua kërcënuar edhe jetën.
Një incident i tillë është regjistruar mbrëmjen e së shtunës në rrugën “Ekrem Rexha” në Prizren, ku një qytetar ka sulmuar fizikisht zyrtarët policorë gjatë kryerjes së detyrës zyrtare.
Burime të sigurta të Sinjalit bëjnë me dije se rreth orës 21:30 të datës 14 qershor 2025, patrulla e policisë ka ndërhyrë në disa parkingje ilegale në këtë zonë. Gjatë kontrollit, një qytetari i është shqiptuar një gjobë për parkim të kundërligjshëm, por ky reagoi me agresivitet të skajshëm.
I dyshuari, i identifikuar si Sefer Fetahaj, 33 vjeçar, ka filluar t’i fyejë rëndë zyrtarët policorë, për të vazhduar më pas me rezistencë fizike. Sipas burimeve, në tentativë për ta larguar me forcë nga zona, Fetahaj ka shtyrë zyrtarët dhe më pas është rrëzuar me fytyrë mbi trotuar, duke pësuar lëndime serioze në fytyrë.
Pavarësisht lëndimeve, ai ka tentuar të sulmojë përsëri policët, çka ka detyruar zyrtarët të përdorin forcë proporcionale dhe të domosdoshme, për ta neutralizuar situatën. Pas vendosjes së prangave, i dyshuari është shoqëruar në stacionin policor, ku ka marrë ndihmën e parë nga emergjenca mjekësore.
Ndërkohë, zyrtarët policorë kanë pësuar lëndime të lehta në duar, gjatë përleshjes fizike.
Sipas mjekut kujdestar të emergjencës, Sefer Fetahaj kishte lëndime të rënda dhe është dërguar me urgjencë në QKUK – Prishtinë për trajtim të mëtejshëm, nën përcjelljen e një patrulle policore.
Lidhur me rastin, hetuesi kujdestar ka informuar Prokurorin e Shtetit, ndërsa pritet vendimi për veprimet e mëtutjeshme ligjore ndaj të dyshuarit. Rasti është iniciuar si “Sulm ndaj personit zyrtar”.
