Një stërvitje e përbashkët evakuimi është zhvilluar në Kosovë nga një togë italiane e batalionit kinetik të Komandës Rajonale West dhe një Ekip Austriak Monitorimi të Ndërlidhjes, me fokus në rritjen e shpejtësisë, koordinimit dhe gatishmërisë në situata emergjente, shkruan Gazeta Sinjali.
KFOR-i njoftoi se kjo stërvitje është pjesë e angazhimit të vazhdueshëm për të zbatuar mandatin e tij në përputhje me Rezolutën 1244 të Këshillit të Sigurimit të OKB-së të vitit 1999. Synimi kryesor mbetet garantimi i një mjedisi të sigurt dhe të qëndrueshëm për të gjitha komunitetet që jetojnë në Kosovë, si dhe sigurimi i lirisë së lëvizjes në çdo kohë.
Operacioni është zhvilluar në bashkëpunim të ngushtë me Policinë e Kosovës dhe misionin e BE-së për sundimin e ligjit, EULEX, si pjesë e rolit të tyre të përbashkët për ruajtjen e sigurisë dhe stabilitetit në vend.
