Aktualisht nuk ka marrëveshje për armëpushim ose ndërprerje të operacioneve ushtarake. Kështu deklaroi para katër orësh ministri i Jashtëm iranian, Abbas Araghchi në X, sipas të cilit përgjigjja e Iranit do të vazhdojë derisa sipas tij, Izraeli të ndërpresë agresionin.
“Siç e ka bërë të qartë vazhdimisht Irani: Izraeli nisi luftë kundër Iranit, jo anasjelltas. Deri më tani, nuk ka asnjë “marrëveshje” për ndonjë armëpushim ose ndërprerje të operacioneve ushtarake. Megjithatë, me kusht që regjimi izraelit të ndalojë agresionin e tij të paligjshëm kundër popullit iranian jo më vonë se ora 4 e mëngjesit sipas kohës së Teheranit, ne nuk kemi ndërmend të vazhdojmë përgjigjen tonë më pas”, shkroi Araghchi.
Sipas ministrit iranian, “vendimi përfundimtar për ndërprerjen e operacioneve ushtarake nga Teherani do të merret më vonë dhe me kusht që regjimi izraelit të ndërpresë agresionin e tij të paligjshëm kundër popullit iranian” deri në mëngjesin e sotëm.
Reagimi vjen pasi presidenti amerikan Donald Trump njoftuar arritjen e marrëveshjes së paqes mes Iranit dhe Izraelit.
Më vonë, televizioni shtetëror iranian njoftoi se një armëpushim midis Iranit dhe Izraelit është tani në fuqi.
Pak orë pasi Presidenti i SHBA-së Donald Trump njoftoi se ishte arritur një armëpushim dhe lufta kishte mbaruar, Irani qëlloi raketa në Izrael, duke vrarë tre persona.
Presidenti i SHBA-së Donald Trump tha se armëpushimi midis Izraelit dhe Iranit nuk do të kishte qenë i mundur pa pilotët e bombarduesve amerikanë B-2. Ai thotë se misioni i tyre dy ditë më parë, i cili goditi objektet bërthamore iraniane, “bashkoi të gjitha palët” dhe çoi në një marrëveshje.
“Është rënë dakord plotësisht midis Izraelit dhe Iranit që do të ketë një ARMPUSHIM të plotë dhe total (përafërsisht brenda 6 orësh nga tani, kur Izraeli dhe Irani të jenë tërhequr dhe të kenë përfunduar misionet e tyre të fundit në zhvillim e sipër!), për 12 orë, në të cilën pikë Lufta do të konsiderohet e MBARUAR”, ka shkruar presidenti amerikan në mediat sociale.
Sipas njoftimit të Trump, Irani do të jetë i pari që fillon me respektimin e armëpushimit dhe pas 12 orësh, Izraeli duhet të përmbush armëpushimin poashtu brenda 12 orëve të tjera.
“Gjatë çdo ARMËPUSHIMI, pala tjetër do të mbetet PAQËSORE dhe RESPEKTUESE. Me supozimin se gjithçka funksionon siç duhet, dhe që do të funksionojë, do të doja t’i përgëzoja të dy vendet, Izraelin dhe Iranin, që patën Qëndrueshmërinë, Guximin dhe Inteligjencën për t’i dhënë fund asaj që duhet të quhet “LUFTA 12-DITORE”. Kjo është një luftë që mund të kishte vazhduar me vite dhe të kishte shkatërruar të gjithë Lindjen e Mesme, por nuk ndodhi dhe nuk do të ndodhë kurrë! Zoti e bekoftë Izraelin, Zoti e bekoftë Iranin, Zoti e bekoftë Lindjen e Mesme, Zoti i bekoftë Shtetet e Bashkuara të Amerikës dhe Zoti e BEKOFTË BOTËN!”, ka shkruar Trump.
