Departamenti Amerikan i Shtetit ka kërkuar nga qytetarët amerikanë që të tregojnë kujdes të shtuar gjatë vizitës në Kosovë, për shkak të rrezikut të vazhdueshëm nga terrorizmi dhe mundësisë për trazira civile në Veri të vendit.
Në përditësimin e publikuar në faqen zyrtare Travel.State.Gov, qytetarët amerikanë këshillohen të rishqyrtojnë udhëtimin në katër komunat veriore – Mitrovicën e Veriut, Leposaviq, Zubin Potok dhe Zveçan – për shkak të tensioneve etnike dhe potencialit për shpërthim të trazirave civile.
“Grupet terroriste vazhdojnë të planifikojnë sulme në rajonin e Ballkanit, përfshirë Kosovën. Terroristët mund të sulmojnë pa paralajmërim ose me pak paralajmërim”, thuhet në njoftim.
Si objektiva të mundshëm përmenden ngjarjet publike, vendet fetare, hotelet dhe restorantet e frekuentuara nga turistët, shkollat, parqet, qendrat tregtare dhe infrastruktura e transportit publik.
Në komunikatë theksohet se pavarësisht faktit se trazirat e fundit në Veri të Kosovës kanë qenë të karakterit politik dhe nuk kanë prekur drejtpërdrejt turistët apo komunitetin ndërkombëtar, ekziston rreziku që edhe kalimtarët e rastësishëm të mund të preken.
“Qeveria e SHBA-së ka aftësi të kufizuar për të ofruar shërbime emergjente për qytetarët amerikanë në veri të Kosovës, pasi udhëtimi i punonjësve të qeverisë amerikane në Mitrovicën e Veriut, Leposaviq, Zubin Potok dhe Zveçan është i kufizuar”.
Më 7 qershor, ministri në detyrë i Punëve të Brendshme, Xhelal Sveçla, njoftoi për një tjetër aksion të suksesshëm të Policisë së Kosovës, gjatë të cilit janë zbuluar armë dhe pajisje ushtarake në pjesën veriore të Kosovës.
Në këtë aksion, sipas Sveçlës, ishin gjetur tre zolla, dy helmeta balistike , dy çanta ushtarake, një jelek antiplumb dhe një maskë kundër gazit.
