Deputeti i LDK-së, Besian Mustafa konsideron se deklaratat e fundit publike të kryeministrit në detyrë, që sfidon opozitën “të provojë ta rrëzojë në Kuvend”, nuk janë shenjë force, por dëshmi e arrogancës dhe degradimit politik që ka kapluar qeverisjen aktuale.
Ai pohon se Kurti nuk e ka më as shumicën parlamentare, as legjitimitetin politik dhe as mbështetjen qytetare.
Sipas Mustafës, ajo që i ka mbetur Kurtit është vetëm arroganca.
“Në vend të reflektimit për dëmin që i shkaktuar vendit dhe qytetarëve në katër vjet, ai zgjedh të sfidojë, fyejë dhe provokojë si të ishte në kopsht fëmijësh e jo në institucionin më të lartë të Republikës sonë parlamentare. Rikujtojmë se me këtë stil qeverisës nuk mund të ndërtohet as shtet, as mirëqenie, as dinjitet. Refuzimi ynë është i qartë: me këtë qasje, me këtë logjikë përçarëse e konfliktuale, nuk mund të ecim bashkë. Dhe nuk do të ecim”.
Ai pohon se ky model duhet të marrë fund.
“Politika e krizës permanente, e arrogancës ndaj institucioneve, opozitës dhe qytetarëve, duhet të mbyllet me këtë mandat të dështuar. VV duhet të reformohet urgjentisht nëse dëshiron të ketë rol në të ardhmen politike të vendit”.
Mustafa tutje thekson se LDK do të investojë në kthimin e normalitetit politik.
“Ne ofrojmé tash e 36 vjet një platformë për stabilitet institucional, për bashkëpunim politik dhe zhvillim ekonomik. Mjaft me provokime e sjellje të papërgjegjshme! Kosovës i duhet maturi dhe vizion, jo sfida dhe përbuzje”.
Kryeministri në detyrë, Albin Kurti, ka thënë se opozita është duke ia zgjatur mandatin qeverisë së tij. Madje sipas tij, “dikush mund të mendojë se ekziston një marrëveshje”.
Kurti ka thënë se kjo po ndodh me vonesat në konstituim të Kuvendit, tash e pesë muaj prej zgjedhjeve të 9 shkurtit. Ai e cilësoi të pakuptueshme mosvotimin e opozitës për komisionin për votim të fshehtë për kryeparlamentarin.
“Ju gjithmonë e dini që kam hyrë në çerekun e dytë të vitit të pestë të mandatit të plotë. Çdo opozitë demokratike përpiqet që t’ia shkurtojë mandatin qeverisë. Përveç opozitës kosovare, e cila, siç jeni dëshmitarë të gjithë ju, po e zgjat mandatin e qeverisë Kurti. Dikush edhe mund të mendojë se kemi marrëveshje. Pra, ne si qeveri në detyrë kemi marrëveshje me opozitën aktuale që të qëndrojmë sa më shumë në pushtet. Por ju siguroj që kjo nuk është e vërtetë. Nuk kam shpjegim për këtë sjellje nëpër të cilën po kalojnë institucionet e Kosovës”, ka thënë ai pas vendosjes së gurthemelit për një aneks të Ministrisë së Shëndetësisë në Fushë-Kosovë.
“Ne, në bazë të nenit 31 të Ligjit për Qeverinë, kemi më pak kompetenca, por kemi njësoj shumë punë. Sa më herët që e konstituojmë Kuvendin, duke e formuar me votim të fshehtë kryesinë e Kuvendit, aq më shpejt do të jemi edhe te qeveria e re”, tha Kurti.
