Zyra për Kosovën në Qeverinë e Serbisë ka pretenduar se autoritetet kosovare kanë dëbuar edhe një tjetër pjesëtar të Ministrisë së Punëve të Brendshme të Serbisë, i cili jetonte në komunën e Shtërpcës – një zonë me shumicë serbe në jug të Ibrit.
Sipas njoftimit të kësaj zyreje, pjesëtari i MPB-së serbe ishte duke u kthyer në Kosovë nga Maqedonia e Veriut, kur u ndalua në pikën kufitare në Han të Elezit dhe u dëbua gjatë natës nga territori i Kosovës. Aktualisht, ai ndodhet në Serbi.
“Po vazhdon politika e ndjekjes së policëve serbë nga territori i Kosovës, të cilëve në këtë mënyrë po u shkelen të drejtat themelore të njeriut, të garantuara nga shumë konventa ndërkombëtare, ndërkohë që nuk kanë asnjë mbrojtje nga misionet ndërkombëtare, të cilat do të duhej t’u garantonin respektimin e të drejtave serbëve në Kosovë”, thuhet në deklaratën e Zyrës për Kosovën.
Sipas këtij institucioni serb, polici i dëbuar ka qenë i angazhuar në Drejtorinë Rajonale të Policisë në Banjën e Nishit – aty ku Serbia pretendon se është zhvendosur edhe Drejtoria Rajonale e Policisë së Prishtinës.
Zyra serbe për Kosovën thotë se ky është rasti i njëmbëdhjetë me radhë i dëbimit të zyrtarëve policorë serbë nga Kosova.
