Ambasadori i Kosovës në Kroaci, Martin Berishaj, sot sërish ishte në Prishtinë.
Jo për të marrë pjesë me ndonjë organizim apo diçka të tillë, por pati sërish punë në Prokurorinë Speciale.
Si i dyshuar për shpërlarje parash, shmangie nga tatimi e deklarim të rrejshëm të pasurisë, Berishaj u intervistua gjatë ditës.
Lajmin e ka bërë të ditur zëdhënësja e Prokurorisë Speciale, Arbnora Luta.
“Referuar kërkesës suaj, mund të konfirmojmë se z.Martin Berishaj është intervistuar të enjten nga Prokuroria Speciale, në kuadër të hetimeve që janë duke u zhvilluar ndaj tij lidhur me veprat penale “Shpëlarje e parave”, “Shmangie nga Tatimi” dhe “Mos raportimi apo raportimi i rremë i pasurisë, i të ardhurave, i dhuratave , i dobisë tjetër materiale ose i detyrimeve financiare”, thuhet në përgjigje.
E pa një, pa dy, në mbrojtje i doli avokati i tij, Tomë Gashi.
Megjithatë, nuk ishte mbrojtja më e mire.
Me qindra gabime drejtshkrimore, pa thuajse asnjë fjali të shkruar mirë, Gashi tha se Berishaj i dha veç disa sqarime.
Sipas avokatit të Berishajt dhe të VV-së, ky rast është inicuar nga ata që kanë urrejtje patologjike ndaj Vetëvendosjes.
“Per ti ndihmuar Prokurorise Speciale te Kosoves sot zotni Martin Berishaj ka dhene deklarat sqaruese me te cilen ne besojme qe i ka ndihmuar Prokurorise per te eliminuar çdo dyshim per aferen e ndertuat nga gazetari serb i aferm me sherbimin sekret te Serbis me qellim te demtimit te reputacionit te Profesorit Martin Berisha i cili eshte hale ne sy te serbis edhe te disave qe me vetedije apo pa vetedije i shtyjn agjendat e Serbis Ne i falenderohemi Prokurosise e cila perfundimisht besojme qe e ka kristal te qarte se Martin Berishaj ka pesuar paksa demtim kolaterale te atyre qe ne menyre patologjike e urrejne Levizjen Vetevendosje e posacerisht Kryeministrin me te mire qe e ka pas Kosova ndonjere zotni Albin Kurti”, ka shkruar avokati Gashi.
Në anën tjetër, reagime ka pasur nga opozita.
Nënkryetarja e PDK-së, Vlora Çitaku, ka ironizuar duke thënë se Berishaj një ditë po qëndron në ambasadë, një ditë në Prokurori.
“Rreth 140.000 punëtorëve u rrezikohen vendet e punës. Biznese të tëra, sidomos ato prodhuese, janë në prag të mbylljes, për shkak të shtrenjtimit enorm të energjisë elektrike. Po e dini kush nuk e ka këtë hall? Martin Berishaj. Pavarësisht dëshmive publike dhe aferave milionëshe, ai vazhdon të jetë ambasador me fuqi të plotë. Sepse i shërben liderit suprem. Një ditë në Prokurori, një ditë në Ambasadë. Marrezia nuk paska kufi”, ka shkruar Çitaku.
Këtë intervistim ia ka përmendur Hekuran Muratit edhe Hykmete Bajrami, deputete e LDK-së.
“Prandaj, edhe një herë: Pse e latë EFT-në dhe NOA-n të kontrollojnë tregun? Pse u lejua ky monopol me pasoja kaq të rënda ekonomike dhe sociale? Konsultoje mikun e deputetit Kurti, z. Martin Berishajn se sot kish ardhë për ”vizitë” në Prishtinë”, tha Bajrami.
