Vazhdimi i sotëm i seancës konstituive të Kuvendit të Kosovës, i 38-ti me radhë, kishte rrjedhë më ndryshe nga vazhdimet e mëparshme. Një ditë pas aktgjykimit të Gjykatës Kushtetuese në lidhje me situatën e krijuar në Kuvend.
Deputetët e të gjitha partive u pajtuan që ta shtyjnë seancën për të dielën, më 29 qershor, në pritje të takimit të thirrur nga kryetari i Vetëvendosjes, Albin Kurti, me drejtuesit e partive të tjera parlamentare, që pritet të mbahet nesër (e shtunë) në orën 16:00.
Partitë më të mëdha parlamentare thanë se do të marrin pjesë në këtë takim.Një ditë më parë, Gjykata Kushtetuese vendosi se deputetët janë të detyruar ta përfundojnë seancën konstituive brenda 30 ditëve, më së voni deri më 26 korrik, që duket se është momentum i ri në situatën e krijuar në Kuvend.Murati: Kushtetuesja rikonfirmoi se pozicioni ynë ka qenë parimor dhe i bazuar në KushtetutëDeputeti i Vetëvendosjes, Hekuran Murati, tha se Gjykata Kushtetuese dje e ka rikonfirmuar që të gjithë deputetët duhet të marrin pjesë në votim.
“Dje aktgjykimi i Kushtetueses ritheksoi atë që është thënë në vitin 2014 vetëm sa e rikonfirmon se pozicioni ynë ka qenë parimor dhe i bazuar në Kushtetutë. Në asnjërin prej pikave të aktgjykimit Gjykata nuk ka thënë se votimi i fshehtë është antikushtetues, siç po thuhet nga opozita. Gjykata ka konfirmuar se votimi i fshehtë është njëra nga mënyra që mund të përdoret.Të gjitha partitë, sidomos ato që kanë anëtarë në Kryesinë e Kuvendit duhet të arrijnë konsensusin, për emrat që duhet të përfaqësojnë Kryesinë e Kuvendit. Gjykata Kushtetuese dje e ka rikonfirmuar që të gjithë deputetët duhet të marrin pjesë në votim. Nuk mund të vijnë në seancë dhe të mos votojnë. Mosvotimi fare është shkelje kushtetuese. Votimi i fshehtë nuk është në kundërshtim me Kushtetutë”, tha Murati.
Çitaku: PDK ka pasur të drejtë, Kushtetuesja e vërtetoi, koha për kompromis dhe bashkëpunim
Deputetja e PDK-së, Vlora Çitaku, tha se vendimi i Gjykatës Kushtetuese për procesin e konstituimit të Kuvendit konfirmon qëndrimin e vazhdueshëm të PDK-së, duke theksuar se partia e saj ka qenë gjithmonë konsistente dhe e gatshme për bashkëpunim politik, raporton Ekonomia Online.“Situata si kjo, në të cilën ndodhet vendi, kërkon kompromis dhe bashkëpunim, ndërsa PDK-ja nuk u është shmangur asnjëherë takimeve apo përpjekjeve për gjetjen e një zgjidhjeje.
Në takim do të themi po të njëjtat gjëra që i kemi thënë vazhdimisht. Tash e disa muaj, ne besojmë se në politikë dhe në demokraci nuk ka vend për kryeneçësi. Duhet të ketë hapësirë për kompromis dhe për bashkëpunim”, u shpreh Çitaku.
Bajrami: Vetëvendosje e interpreton ndryshe nga krejt Kosova aktgjykimin e Gjykatës Kushtetuese
Deputetja e LDK Hykmete Bajrami, tha se Vetëvendosje po intepreton ndryshe nga krejt Kosova aktgjykimin e Gjykatës Kushtetuese, raporton Ekonomia Online.“VV-ja e ka në plan ta vazhdojë këtë ngërç politik duke bërë një interpretim ndryshe nga krejt Kosova të aktgjykimit të Gjykatës Kushtetuese.
Aktgjykimi është jashtëzakonisht i qartë, ku ka një agjendë të paracaktuar të seancës konstituive. Aty janë tri pika në ndërkohe që kur flitet për votimin e fshehtë nuk ka referenca për ndryshimin e rëndit të ditës.Më shumë se 35 herë kemi një mocion procedura që nuk është pjesë e rend it të ditës ka një insistim që të vazhdohet. Na vjen keq që jemi betonuar rreth një procedure. LDK do të marr pjesë nesër në takim pavarësisht mungesës së bashkëpunimit nga ana e VV-së. Nuk mund të presim diçka. Ky tanimë është më shumë shou mediatik”, tha Bajrami.
Haradinaj: U dakorduam për shtyrjen e seancës, s’ishte mirë që Kurti mungoi në takim
Deputeti i AAK-së, Ramush Haradinaj, tha se në takimin e mbajtur sot të partive politike është arritur pajtimi që seanca konstituive të shtyhet.
“Jemi dakorduar që të shtyhet seanca. Nuk ishte e duhur mungesa e kryeministrit në detyrë, Albin Kurti, në këtë takim të rëndësishëm, ndërkohë që vetë Kurti ka ftuar një tjetër takim për nesër”, tha Haradinaj.
Më parë, ai tha se nëse dakordohen për kandidaturën për kryetar të Kuvendit, AAK-ja voton.Limaj: Porosia e Gjykatës, konstituimi i Kuvendit është tërësisht vendim i forcave politikeDeputeti i Nismës Socialdemokrate, Fatmir Limaj, pas shtyrjes së seancës së Kuvendit, tha se nesër në ora 16:00 do të mbahet një takim mes drejtuesve politikë.
“Pres që të gjithë të jenë në tavolinë”, tha Limaj.
Më herët, ai tha se porosia e porosia e Gjykatës Kushtetuese është që konstituimi i Kuvendit është tërësisht vendim politik i forcave politike dhe i deputetëve“Nuk mundemi ne si Gjykatë t’ju bashkojmë për të ndërtuar marrëveshje politike, sepse nuk është roli i Gjykatës. Pak a shumë kështu është interpretimi i Gjykatës Kushtetuese, nëse interpretohet porosia”, tha Limaj.
