Ish-kryeministri i Kosovës, Avdullah Hoti, ka reaguar lidhur me situatën e krijuar rreth financimit të Radio Televizionit të Kosovës (RTK), duke vënë në pah se alokimi i përkohshëm i buxhetit për këtë medium publik është i mundur dhe i mbështetur ligjërisht – pavarësisht mungesës së një Kuvendi funksional.
Përmes një postimi në Facebook, Hoti ka rikujtuar se një vendim i ngjashëm ishte marrë nga Qeveria që ai drejtonte në janar të vitit 2021, kur ishte në detyrë, për të garantuar vazhdimësinë e financimit për RTK-në.
“Fondet për RTK-në tashmë janë të ndara në Ligjin për ndarjet buxhetore për vitin 2025, andaj nuk ka asnjë pengesë ligjore që ato të mos alokohen përkohësisht,” ka shkruar Hoti.
Ai kritikoi Qeverinë Kurti për, siç tha, mungesën e një zgjidhjeje të qëndrueshme për financimin e RTK-së gjatë pesë viteve të qeverisjes, duke kujtuar se buxheti i këtij institucioni ka pësuar ulje nga 11.2 milionë euro në vitin 2021, në 8.9 milionë euro nga viti 2022 e tutje – shifër që ka mbetur e pandryshuar përkundër rritjes së inflacionit.
Gjithashtu Hoti i renditi edhe disa pika për të cilat kërkoi që Kuvendi i ardhshëm t’i trajtojë me prioriet.
Ai ka thënë se Kuvendi i ardhshëm duhet të:
• Të gjejë zgjidhje të përhershme për financimin e RTK-së sipas modeleve evropiane.
• Të bëjë ndryshime esenciale ligjor që garantojnë pavarësinë e RTK-së nga politika dhe përcaktojë standarde të larta dhe transparente sa i përket etikës gazetareske në këtë medium publik.
• Të miratojë konceptin e planit strategjik për zhvillim të RTK-së, ku adresohet avancimi i vazhdueshëm profesional dhe teknologjik i këtij mediumi publik të pazëvendësueshëm.
