Gjykata Themelore në Mitrovicë me aktvendim ka caktuar masën e paraburgimit prej 1 muaji për të pandehurin Murat Latifi, i cili është polic i Njësisë Speciale Operative, pasi që dyshohet për keqpërdorim të detyrës zyrtare, zbulim të fshehtësisë zyrtare, mbajtje në pronësi të paautorizuar të armëve dhe përdorim të armës në një lokal, ku ka shtënë në ajër gjatë një ahengu.
Burime të Veriu.info bëjnë të ditur se sipas shkresave të prezantuara në seancën e sotme nga prokurorja e rastit, dyshohet se polici Murat Latifi ka keqpërdorur detyrën zyrtare më datë 2 shtator 2025, pasi që ka shkuar te shtëpia e Kreshnik Malokut, që është i pandehur në një rast penal, ku me veturën Golf VIII e merr nga shtëpia e tij dhe e largon në drejtim të Prishtinës.
Në shkresat e lëndës që i ka parë Veriu.info thuhet se polici Murat Latifi në cilësinë e personit zyrtar pa autorizim përmes telefonit komunikon me të pandehurin Kreshnik Maloku në lidhje me një dron që ky i fundit ka parë mbi shtëpinë e tij, për të cilin dyshonte se ishte i policisë. Gjatë kësaj telefonate, sipas prokurorisë, polici Murat Latifi i thotë Kreshnik Malokut se në rast kur ai është duke u hetuar ose kur do të ketë veprime hetimore ndaj tij, do ta informoj.
Në kerkesën për caktimin e paraburgimit thuhet se gjatë bastisjes në shtëpinë e policit të arrestuar, Murat Latifi, janë gjetur 25 fishekë që i mbante ilegalisht.
Sipas prokurori, polici i arrestuar po dyshohet edhe që ka ndërmarrë në vazhdimësi veprime që minojnë procesin hetimor dhe duke u dhënë përkrahje aktive personave tjerë të dyshuar.
Veriu.info mëson se gjatë kohës sa ishte zyrtar policor Murat Latifit i janë shqiptuar masa disiplinore për sjellje të papranueshme.
Pas prezantimit të provave nga prokuroria, mbrojtjen e kanë paraqitur i pandehuri dhe avokati i tij, të cilët në tërësi i kanë mohuar pretendimet e prokurorisë. Në fund Gjyqtari i Procedurës Paraprake në Gjykatën Themelore të Mitrovicës, Bekim Veliqi, ka nxjerrë aktvendim me të cilin i caktohet masa e paraburgimit prej 1 muaji.
Në arsyetimin e aktvendimit thuhet se gjykata ka gjetur se ekziston dyshimi i bazuar se i pandehuri ka kryer veprat penale të përshkruara me kërkesën për caktimin e masës së paraburgimit, si dhe ekziston rreziku i ndikimit në dëshmitarë dhe rreziku i përsëritjes së veprave penale.
Veriu.info dje ka raportuar që polici i arrestuar dyshohet që ka bashkëpunuar me anëtarë të familjes Gërbeshi nga Vushtrria, të cilët po hetohen për përfshirje në disa raste penale.
Siç mëson Veriu.info, i pandehuri Kreshnik Maloku nga fshati Ropicë është familjar i familjes Gërbeshi, anëtarë të së cilës po hetohen së bashku me të për vepra penale/Veriu.info
