Në Gjykatën e Vushtrrisë kanë arritur 4 të arrestuarit e djeshëm në fshatin Ropicë, Avdullah Gerbeshi, Rrahman Gerbeshi, Emin Gerbeshi dhe Kadri Gerbeshi, ku do të vendoset për caktimin e masës së paraburgimit.
Prokuroria Themelore në Mitrovicë – Departamenti i Përgjithshëm, ka bërë të ditur se ka kërkuar nga Gjykata Themelore në Mitrovicë – Dega Vushtrri caktimin e paraburgimit për të pandehurit me iniciale Rr.G., A.G., dhe E.G., për shkak të dyshimit për kryerjen e veprës penale veprës penale “Detyrimi”, si dhe për personin me iniciale K.G., për veprat penale “Lëndimi i lehtë trupor“ dhe “Arratisja e personave të privuar nga liria“.
“Të katër (4) të pandehurit janë arrestuar ditën e djeshme, datë 21 shtator, në një operacion të Prokurorisë Themelore në Mitrovicë, në koordinim me Drejtorinë për Hetimin e Krimit të Organizuar dhe Krimeve të Rënda, me ç`rast janë kontrolluar lokacione në fshatin Ropicë të Vushtrrisë dhe në qytetin e Vushtrrisë”, thuhet në njoftimin e prokurorisë.
Tutje, bëhet e ditur se gjatë operacionit, të dyshuarve u janë gjetur dhe sekuestruar: dy (2) armë të shkurta, 352 copë fishekë të kalibrave të ndryshëm, dy (2) karikatorë, dy (2) palë dylbi, shtatë (7) telefona celularë, një (1) shkop druri, një (1) palë dorëza, një (1) thikë, dokumente të ndryshme, një (1) pasaportë, një (1) patentë shofer, një (1) USB, një (1) llap-top, një (1) palë patika dhe një (1) çelës motori.
“Të pandehurit, me vendim të prokurorit, gjenden në ndalim 48 orësh, ndërkaq seanca për caktimin e masës së paraburgimit do të mbahet në Gjykatën Themelore Mitrovicë – Dega Vushtrri”, përfundon njoftimi i prokurorisë.
