Gjatë vitit të kaluar, remitancat në Kosovë kanë arritur vlerën prej 1.42 miliard eurosh, duke shënuar një rritje prej 4.4% ose rreth 60 milionë euro më shumë krahasuar me vitin 2024.
Sipas të dhënave, muaji dhjetor mbetet ende me të dhëna preliminare dhe pritet të finalizohet në fund të shkurtit.
Banka Qendrore e Kosovës ka bërë të ditur se pjesa më e madhe e remitancave ka ardhur nga Gjermania me rreth 39% të totalit, pastaj Zvicra me 17.5%, Shtetet e Bashkuara të Amerikës me 7.2%, Austria me 4.2%, Italia me 3.9%, ndërsa Belgjika dhe Franca me nga 3.4%, transmeton albinfo.ch.
Tutje, bëhet e ditur se sa i përket mënyrës së dërgimit të parave, rreth 55% e remitancave janë transferuar përmes agjencive për transfere të mjeteve, 17% përmes bankave dhe 28% përmes kanaleve të tjera.
Mesatarja mujore e remitancave ishte rreth 117.9 milionë euro, ndërsa prurjet më të mëdha u regjistruan në muajt korrik, gusht dhe dhjetor, kryesisht në periudhat kur mërgimtarët janë në Kosovë.
