Kryeministri i Republikës së Kosovës, Albin Kurti, ka folur sërish për rrezikun e një lufte të mundshme me Serbinë.
Në një intervistë për tabloidin ‘Reuters’, Kurti ka thënë se Kosova është e përgatitur të qëndrojë kundër një sulmi të mundshëm nga Serbia pasi përkeqësimi i grindjeve me pakicat serbe mund të rezultojë në një konflikt të ri të armatosur.
“Nuk duhet të përjashtojmë që këto politika agresive të Beogradit në një mënyrë apo tjetrën mund të kthehen edhe në një sulm kundër Kosovës”, është shprehur Kurti.
Tutje Kurti vazhdoi paralajmërimet, duke thënë se nuk jemi të frikësuar.
“Unë nuk po them se do të na sulmojnë këtë javë ose në vijim, por do të ishte krejtësisht e papërgjegjshme të përjashtohej mundësia e rritjes së tensioneve dhe konflikteve të reja”.
Përkundër kësaj, Kurti ka kritikuar edhe Rusinë, shtet miqësor i Serbisë, duke thënë se mund të jetë një nga faktorët e përkeqësimit të gjendjes në veri të Kosovës.
“Presidenti despotik rus, Vladimir Putin është një njeri i luftës dhe ai ka interes të përhapë luftën sepse dëshiron që ta normalizojë atë”, tha shefi i Qeverisë.
