Pas sulmeve linçuese ndaj presidentes së Kosovës, Vjosa Osmani, deputeti Haxhi Avdyli sot ka dhënë dorëheqje nga partia GUXO, në shenjë proteste për të mos identifikuar veten me këtë fushatë të ulët.
Burime të Veriu.info bëjnë të ditur se pas Haxhi Avdylit, së shpejti pritet edhe dorëheqja e një deputeteje nga partia GUXO, e cila pritet të rreshtohet politikisht me Vjosa Osmanin.
Siç mëson Veriu.info, dorëheqja e saj do të ndodhë për shkak se drejtuesit e partisë GUXO janë rreshtuar kundër Vjosa Osmanit në procesin e zgjedhjes së presidentit/es të ri, duke mbajtur anën e Albin Kurtit.
Ndryshe, Vjosa Osmani kishte themeluar partinë GUXO, por që me marrjen e mandatit të presidentes ajo është dashur të japë dorëheqje, dhe tash pozitën e kryetarit të GUXO e bashkëndajnë Donika Gërvalla e Faton Peci.
Donika Gërvalla me veprime publike ditëve të fundit është rreshtuar krah Albin Kurtit, ndërsa Faton Peci akoma nuk ka dalë me qëndrim në lidhje me procesin e zgjedhjes së presidentit të ri.
Nxjerrja e dekretit për shpërndarjen e Kuvendit nga presidentja Vjosa Osmani ka qenë pikë finale e ndarjes së saj politike me VV e Albin Kurtin, ku menjëherë kishin filluar akuzat e kundërakuzat mes dy kampeve. /Veriu.info
Presidenca thotë se Osmani përballet me thirrje për pushkatim, kërkon reagim urgjent të drejtësisë
