Kurdo që besojmë se kemi arritur kulmin e befasisë nga vendimet e politikanëve, pikërisht në atë moment del një nga ta që vendos të thyej çdo limit befasie.
I tillë është edhe vendimi i kryetarit të komunës së Skenderajt, Sami Lushtaku, për ta angazhuar si këshilltar të jashtëm biznesmenin e afërt me të, pronarin e kompanisë së ndërtimit “Andra Invest” Astrit Çitakun.
Pra është pikërisht njeriu që shoqëroi Sami Lushtakun në vizitën e tij misterioze në Libi, ngjarje për të cilën raportoi ekskluzivisht Gazeta Online Veriu.info. Pra, është pikërisht Astrit Çitaku, pronar i kompanisë së ndërtimit, puna e të cilit në vitin 2024 kishte çuar në aktakuzë ndaj 3 zyrtarëve komunalë në Skenderaj.
Le ta shtjellojmë mirë e qartë relacionin e Çitakut me Lushtakun, që më tepër se këshilldhënës ka natyrë bashkëpunimi shumë më të afërt, siç e dëshmon edhe vizita e përbashkët në Libi.
Veriu.info në janar 2026 ka raportuar për një vizitë ‘misterioze’ të Astrit Çitakut me Sami Lushtakun në Libi, për të cilën pronari i “Andrra Invest” nuk kishte pranuar të tregojë arsyen e vizitës.
Veriu.info kishte dërguar pyetje në adresë të tij dhe ai ishte përgjigjur kështu: “Çfarë lajmi? Pse duhet me ditë? Unë në Prishtinë ndërtoj, në Skenderaj e kam kry!”
Por po del që në Skenderaj nuk e ka kryer, pasi që vetëm një muaj para kësaj përgjigjeje atij i ishin ndaluar punimet në objektin “Andrra Premium”.
Në shtatorin e vitit 2024 Prokuroria Themelore në Mitrovicë kishte ngritur aktakuzë ndaj 3 zyrtarëve komunalë të Skenderajt si dhe zhvillonte hetime ndaj Astrit Çitakut si pronar i “Andra Invest”.
Kjo lidhej me dëmtimet që kjo kompani kishte bërë për banorët në rrugën “Emin Lati” në Skenderaj, me ndërtimet që po kryente.
Prokuroria Themelore e Mitrovicës, kishte filluar hetimet ndaj personave përgjegjës të kompanisë “Andrra Residence”.
Ndërsa, ndaj tre zyrtarëve të Komunës së Skenderajt kishte ngritur aktakuzë për “Keqpërdorimi i pozitës apo autoritetit zyrtar”, kështu patën konfirmuar nga Prokuroria.
“Njoftoheni se për personat A.Ç., dhe A.,Ç rasti është ende nën hetime. Ndërkaq, për tre persona zyrtarë, Prokuroria Themelore në Mitrovicë ka ngritur aktakuzë me datë 10 qershor 2024, për shkak të veprës penale “Keqpërdorimi i pozitës apo autoritetit zyrtar”, thuhet në përgjigjen e dhënë nga Prokuroria.
Krejt ky rrugëtim me shumë mistere i Astrit Çitakut bën që ai të angazhohet si këshilltar i jashtëm i Sami Lushtakut, ndoshta si përpjekje për të normalizuar vizitën e përbashkët muaj më parë në Libi.
