Anëtari i shoqërisë civile, Rron Gjinovci, bashkëpunëtor dhe mik i Shkëlzen Gashit, autorit të ekspozitës me pasaktësi për masakrat e kryera gjatë luftës në Kosovë, ka kërkuar falje.
Pasi dje akuzoi familjarë të viktimave civile se i kishin paraqitur ata si ushtarë për shkak të “marrjes së një pensioni më të madh”, sot ka shprehur keqardhje.
“Fillimisht, u kërkojmë falje të sinqertë të gjithë familjarëve të viktimave civile të luftës, të gjithë atyre që janë prekur drejtpërdrejt apo tërthorazi nga lufta në Kosovë, bashkëpunëtorëve tanë dhe opinionit të gjerë publik për situatën e krijuar”, shkroi ai në një postim në Facebook.
“Qëllimi i ekspozitës sonë ka qenë i qartë dhe i pandryshueshëm: të nderojë viktimat civile të luftës dhe të kontribuojë në ruajtjen e kujtesës kolektive për krimet e kryera në Kosovë. Në asnjë moment dhe në asnjë formë nuk kemi pasur synim të lëndojmë apo të ofendojmë askënd”, shtoi Gjinovci.
Çka shkruajti dhe Rron Gjinovci?
Në një reagim të gjatë me të cilin mundohej të arsyetonte skandalin e ekspozitës në krye të së cilës ishte shoku i tij, Shkelzen Gashi, Rron Gjinovci ndër të tjera kishte kishte akuzuar familjarët e viktimave të luftës: “Ky fenomen ndodh për shkak të arsyeve të ndryshme, por nji nga ma të shpeshtat është deklarimi i civilëve të vramë si ushtarë. Supozohet se kjo ndodh me qëllim të ngritjes së vlerës së tyne dhe/apo marrjes së nji pensioni ma të madh që e ndan shteti për familajrët e të vramve si ushtarë në krahasim me të vramët si civilë.”
