Kapiteni i Shqipëria, Berat Gjimshiti, ka folur në prag të përballjes së rëndësishme ndaj Ukraina, duke analizuar rrugëtimin e kuqezinjve në kualifikueset e Botërorit dhe gjendjen aktuale të skuadrës.
Mbrojtësi theksoi se, pavarësisht zhgënjimit të fundit, ekipi duhet të reagojë dhe ta kthejë negativitetin në motivim për sfidat që vijnë.
Si do ta vlerësonit rrugëtimin e Shqipërisë në kualifikueset e Botërorit?
Rrugëtimi ka qenë shumë pozitiv. Gjithsesi, jeta ecën shpejt dhe duhet të mendojmë vetëm për atë që kemi përpara. Humbja me Poloninë e prishi pak bukurinë e asaj që kemi bërë në këto dy-tri vite, por në përgjithësi bilanci mbetet pozitiv. Ka njëfarë negativiteti në mendje, por duhet ta kthejmë në forcë për të ardhmen.
Si e vlerësoni Ukrainën dhe si është gjendja e lojtarëve të Shqipërisë?
Është një skuadër e fortë, në të njëjtin nivel ku ishim edhe ne në garë për një vend në Botëror. Duhet vlerësuar maksimalisht si kundërshtar. Sa i përket gjendjes së ekipit, sigurisht që jemi të mërzitur, por me kalimin e kohës duhet ta kthejmë këtë në diçka pozitive. Prandaj do të kërkojmë një lojë dhe rezultat pozitiv ndaj Ukrainës.
Keni luajtur me Malinovskin tek Atalanta, si ndikon ai tek Ukraina dhe si e vlerësoni si lojtar?
Kemi kaluar vite shumë pozitive te Atalanta. Vlerësimi për të është shumë i lartë, si si futbollist ashtu edhe si njeri. Ai është një lojtar kyç për Ukrainën. Arma e tij më e fortë është goditja nga distanca, ndaj duhet të kemi shumë kujdes që të mos i japim hapësira.
