Nexhi Krasniqi, shqiptari nga Kosova që tërhoqi edhe vëmendjen e NASA-s pasi e vuri në pikëpyetje autenticitetin e një fotografie të publikuar nga misioni Artemis II, të realizuar gjatë fluturimit rreth anës së largët të Hënës, nuk është ende i bindur nga shpjegimi i vetë NASA-s për të.
Ai thotë se ka bërë “një analizë me vetveten”, duke e përsëritur pyetjen që ia bëri NASA-s: “Ku janë yjet?”.
“Në momentin kur e pashë postimin e fotos që e kish postu NASA, tu bë analizë me vetveten unë, tu e pa se një fotografi që bëhet prej një distance pas një planeti si Hëna edhe shihet Toka prapa saj edhe shihet pjesa dërrmuese e horizontit, e hapësirës, tu e këqyre, tu bo analizë, tu thënë ku janë yjet? S’shifen yjet fare. Pse Toka kaq e madhe po duket në krahasim më Hënën. Nëse ata janë afër Hënës qysh po ka mundësi Toka me u duk kaq e madhe? Edhe retë e bardha u shihshin aty. Edhe m’u duk absurde me thënë të drejtën edhe thash hajt ta lëshoj këtë koment”, tha ai për Tëvë1.
Ai e vuri në pikëpyetje autenticitetin e disa pamjeve të Hënës të publikuara nga NASA, të realizuara gjatë misionit Artemis II. Në postimin e NASA-s ku paraqiteshin pamje të realizuara nga anija kozmike Orion gjatë fluturimit rreth anës së fshehtë të Hënës, qytetari nga Kosova pyeti pse nuk duken yjet dhe sugjeroi se pamjet mund të ishin krijuar nga inteligjenca artificiale.
“Pse nuk janë të dukshme yjet nga kjo pozicion? Dyshoj se është krijuar nga inteligjenca artificiale!”, shkroi ai në koment.
Reagimi nga NASA nuk vonoi. Pas vetëm pesë minutash, NASA iu përgjigj drejtpërdrejt Nexhi Krasniqit, duke shpjeguar arsyen shkencore pas mungesës së yjeve në pamje.
“Ne s’mund t’i shohim yjet në këto imazhe sepse yjet duken relativisht shumë të zbehtë në krahasim me Hënën, e cila është shumë më afër dhe reflekton shumë më tepër dritë. Kamerat mund të kapin vetëm një interval të caktuar midis pjesëve më të ndritshme dhe më të errëta të një skene”.
Por Nexhi Krasniqi s’është i bindur.
“I kam lexu komentet e njerëzve shumë mirëpo përgjigje prej NASA nuk kam lexu kurrë edhe mu duk si e veçantë. Po unë prapë e kam atë mendim se foto si foto mua vetë po ma jep përshtypjen me u bind se nuk ka mundësi me qenë e fotografuar prej mbrapa Hënës, duke e pa edhe Tokën. Jo se jam ekspert i kësaj lëmie, as s’kam të bëj fare me këtë, mirëpo, me të thënë të drejtën, e kam shiku shumë shpesh, e kam vizitu Google Earth, planetet tjera…”, shprehet ai.
