Ministri i Mbrojtjes mbështet vendosjen e trupave zvicerane në Ballkan dhe shpjegon se si përfiton ushtria zvicerane nga kjo. Në vigjilje të zgjatjes së pritshme të misionit Swisscoy në Kosovë nga Parlamenti zviceran, ministri i mbrojtjes, Martin Pfister i ka dhënë një intervistë gazetave të CH media, ku mbështet vazhdimin e misionit, shkruan albinfo.ch.
Pyetjes nëse pas 27 vitesh shërbim, në kohën kur Parlamenti pritet të miratojë edhe tre vjet të tjera në qershor, a mund të shihet në horizont përfundimi i misionit, Pfister i përgjigjet: Fatkeqësisht, jo ende. Sidomos në veri të Kosovës, ngjarje si ato në Ditën e Pentekostit 2023 (Në Banjskë) tregojnë se situata në këtë pjesë të vendit është e brishtë dhe, nganjëherë, e tensionuar. Për sa kohë që tensionet vazhdojnë dhe nevojitet stabilitet ndërkombëtar, një angazhim mbetet i vlefshëm – edhe sepse paqja dhe stabiliteti në Ballkan janë në interes të Zvicrës.
Pyetja e radhës, duke aluduar në emrin “Vetëvendosje” të partisë që udhëheq me qeverinë, është nëse vazhdon të jetë i dëshiruar KFOR-i në Kosovë
“Pjesëmarrja jonë vlerësohet shumë në terren. Homologu im kosovar, Ejup Maqedonci, ma konfirmoi këtë gjatë vizitës sime verën e kaluar”, është përgjigja e ministrit Pfister.
Më tutje ministri flet për kontributin e deritanishëm të KFOR-it në Kosovë. “Vendosja e tij ka kontribuar qartë në progres. Në të njëjtën kohë, situata mbetet e brishtë. Pikërisht për këtë arsye prania e KFOR-it është thelbësore. Ndihmon në parandalimin e përshkallëzimeve që mund të përhapen në të gjithë rajonin. Është gjithashtu thelbësore që KFOR-i të pranohet nga të gjitha palët. Ekipet tona në terren, veçanërisht ekipet ndërlidhëse, mbajnë kontakt të ngushtë me palët kryesore të interesuara në vend. Kjo siguron një kuptim të qartë të situatës dhe lejon që tensionet të çaktivizohen herët, pe¨rcjell albinfo.ch.
Misioni Swisscoy në Kosovë i kushton ushtrisë rreth 50 milionë franga zvicerane në vit. A ia vlen ky shpenzim? Është pyetja e radhës.
Po, ky mision është një investim në sigurinë tonë. Paqëndrueshmëria në Evropë ndikon edhe në Zvicër – politikisht, ekonomikisht dhe shoqërisht. Në të njëjtën kohë, ushtria jonë përfiton drejtpërdrejt nga vendosja. Ne fitojmë përvojë të vlefshme në kushte të botës reale, për shembull, në përdorimin e teknologjive të reja si dronët. Këto njohuri përfshihen drejtpërdrejt në zhvillimin e mëtejshëm të aftësive tona. Një aspekt tjetër është bashkëpunimi me partnerët. Ushtarët tanë stërviten me forca të tjera të armatosura dhe zbatojnë procedura të përbashkëta. Kjo përvojë forcon aftësitë tona mbrojtëse në një mënyrë shumë të prekshme.
Pyetjes nëse Zvicra, me misionin e saj po ua lehtëson forcave të armatosura të vendeve të tjera angazhimin diku tjetër dhe kështu po shkel parimin e neutralitetit të saj, ministri i përgjigjet negativisht. “Jo. Si një mision i mandatuar nga OKB-ja, KFOR-i bazohet, së pari, në marrëveshjen themelore të palëve në konflikt. Së dyti, Zvicra është e përkushtuar ekskluzivisht për promovimin e paqes; pjesëmarrja në operacionet luftarake për të zbatuar paqen mbetet jashtë diskutimit”.
